युनिकोड
बीपी कोइराला स्वास्थ्य विज्ञान प्रतिष्ठान, धरान र काठमाडौँस्थित राष्ट्रिय आविष्कार केन्द्रबीच स्वास्थ्य सेवालाई थप सुदृढ बनाउने उद्देश्यले द्विपक्षीय समझदारीपत्रमा हस्ताक्षर भएको छ।
प्रतिष्ठानको स्वास्थ्य सेवा, शिक्षा र अनुसन्धानमा गुणात्मक सुधार ल्याउने दीर्घकालीन नीति अनुरूप यो सम्झौता भएको हो।
काठमाडौँमा आयोजित एक विशेष समारोहकाबीच प्रतिष्ठानका तर्फबाट अस्पताल निर्देशक डा जगत नारायण प्रसाद र आविष्कार केन्द्रका तर्फबाट महाप्रबन्धक सञ्जय भाज्यूले समझदारीपत्रमा हस्ताक्षर गरेका हुन्।
समझदारी अनुसार अब राष्ट्रिय आविष्कार केन्द्रले प्रतिष्ठानमा प्रयोग हुने सम्पूर्ण बायोमेडिकल उपकरणहरूको सुपरिवेक्षण तथा मर्मत सम्भारको जिम्मेवारी सम्हाल्नेछ। जसमा दैनिक आधारभूत मर्मतदेखि मेकानिकल र इलेक्ट्रोनिक पार्टपुर्जाहरू, केबल, सेन्सर तथा पावर सप्लाईको मर्मत वा प्रतिस्थापन जस्ता कार्यहरू समावेश छन्।
यसअघि उपकरणहरू बिग्रँदा बाह्य विशेषज्ञहरू कुर्नुपर्ने र त्यसका कारण सेवा प्रवाहमा हुने ढिलाइलाई यो सहकार्यले पूर्ण रूपमा अन्त्य गर्ने विश्वास लिइएको प्रतिष्ठानका प्रवक्ता प्राडा शमशेर श्रेष्ठले जानकारी दिए।
उपकरणहरूको नियमित मर्मत र चुस्त व्यवस्थापन सुनिश्चित भएपछि सेवाग्राहीहरूले बिना कुनै रोकावट थप परिष्कृत र स्तरीय स्वास्थ्य सेवा प्राप्त गर्ने प्रतिष्ठानले जनाएको छ। उक्त हस्ताक्षर कार्यक्रममा प्रतिष्ठानका उपकुलपति प्रा।डा। बिक्रम प्रसाद श्रेष्ठ र आविष्कार केन्द्रका उमेश जङ्ग राईले साक्षीका रूपमा हस्ताक्षर गरे।
प्रतिक्रिया