युनिकोड
राष्ट्रियसभा निर्वाचनअन्तर्गत कर्णाली प्रदेशमा पनि मतदान भइरहेको छ।
देशका अन्य प्रदेशसँगै कर्णाली प्रदेशको राजधानी वीरेन्द्रनगर सुर्खेतमा बिहान ९ बजेदेखि मतदान भइरहेको हो।
यसैबिच कर्णालीका मुख्यमन्त्री यामलाल कँडेलले पनि मतदान गरेका छन्।
यहाँ महिला र अन्य गरी दुई जना राष्ट्रियसभा सदस्य चुनिँदै छन्।
यसका लागि नेपाली कांग्रेस र नेकपा एमालेले गठबन्धन गरेका छन् भने त्यसविरुद्ध नेपाली कम्युनिस्ट पार्टीले उम्मेदवार खडा गरेको छ।
कांग्रेस-एमाले गठबन्धनबाट कांग्रेसका कर्णाली प्रदेश सभापति जुम्लाका ललितजंग शाही र एमालेका केन्द्रीय सदस्य दैलेखकी मीनासिंह रखाल उम्मेदवार छन्।
यस्तै नेकपाबाट रुकुमपश्चिमका बुद्धिप्रसाद शर्मा र डोल्पाकी अञ्जु महतारा शाही उम्मदेवार छन्।
आउने फागुनमा राष्ट्रियसभाका १९ सदस्यको पदावधि सकिँदै छ। तीमध्ये १ जना राष्ट्रपतिले मनोनयन गर्ने व्यवस्था छ।
बाँकी १८ सदस्यमा पनि एक जना (कोसी प्रदेशमा खस आर्यतर्फ सुनिलबहादुर थापा) निर्विरोध निर्वाचित भइसकेकाले आज १७ सदस्यका लागि निर्वाचन भइरहेको हो।
मतदान बिहान ९ बजेदेखि दिउँसो ३ बजेसम्म जारी रहने निर्वाचन आयोगले जनाएको छ।
प्रतिक्रिया