भारतीय प्रान्त उत्तर प्रदेशको गाजियाबादमा पर्ने मुरादनगरमा रहेको धार्मिक स्थलमा महिलाको चेन्जिङ रुममाथि सीसीटीभी क्यामेरा राख्ने विषयमा विवाद भएपछि प्रहरीले स्वघोषित महन्त मुकेश गोस्वामीविरुद्ध मुद्दा दर्ता गरेको छ।
प्रहरीले सीसीटीभी डीभीआर बरामद गरेको छ जसमा महिलाको गोपनीयता हनन हुने धेरै भिडिओ भेटिएका छन्।
एसीपी नरेश कुमारले बीबीसी हिन्दीसँग भनेका छन्, ‘अभियुक्त महन्त मुकेश गोस्वामी फरार छन् र उनको खोजी भइरहेको छ। पीडित महिलाको बयान लिइएको छ। यस विषयमा अनुसन्धान भइरहेको छ।”
एसीपी नरेश कुमारका अनुसार प्रहरीले सीसीटीभी डीभीआर बरामद गरेको छ, त्यसमा धेरै महिलाको आपत्तिजनक भिडिओ फेला परेका छन्। महिलाको चेन्जिङ रुममा फोकस गरेर क्यामेरा जडान गरिएको थियो।
प्रहरीका अनुसार अभियुक्तले आफूलाई महन्त बताए पनि उनी महन्त भएको ठोस जानकारी छैन। अभियुक्तको उमेर ५० वर्ष हाराहारीमा छ।
मन्दिर परिसरमा महिलाको गोपनीयता हनन गरिएको यो घटना बाहिरिएपछि सिँचाइ विभागले पनि मन्दिर परिसरको अतिक्रमण हटाउन सुरु गरेको छ।
स्थानीय सञ्चारमाध्यमका अनुसार एक महिलाले महन्त मुकेश गोस्वामीलाई चेन्जिङ रुमको माथि राखिएको सीसीटीभीबारे जानकारी गराएपछि महन्तले महिलालाई गाली गरेका थिए।
पीडित महिलाले पीसीआर कल गरेर प्रहरीलाई बोलाएकी थिइन्। तर, सो क्रममा महन्त मुकेश गोस्वामी मन्दिर परिसरबाट फरार भएका थिए।
Shares
प्रतिक्रिया