युनिकोड
इरानका सर्वोच्च नेता अयातुल्ला अली खामेनीको अन्त्येष्टि कार्यक्रमको तयारी भइरहेका बेला लामो समयदेखि नदेखिएका इरानको अर्धसैनिक क्रान्तिकारी गार्डका प्रमुख जनरल अहमद वाहिदी अचानक सार्वजनिक भएका छन्।
इरानको सरकारी सञ्चारमाध्यमले सार्वजनिक गरेका तस्बिर र भिडिओयोमा उनी अन्त्येष्टिसम्बन्धी बैठकमा सहभागी भएको तथा तेहरानस्थित खामेनीको पूर्वनिवास नजिक आयोजना गरिएको श्रद्धाञ्जली कार्यक्रममा उनको कास्केट छेउमा बसेको देखिएको छ।
सरकारी सञ्चारमाध्यमका अनुसार ८६ वर्षीय खामेनीको सम्मानमा बिहीबार राति तेहरानको केन्द्र क्षेत्रमा सानो शोकसभा आयोजना गरिएको थियो।
उक्त समारोहमा कालो पोसाकमा उपस्थित शोकाकुल परिवारजनले कफिनतर्फ स्कार्फ र अन्य सामग्री फ्याँकेका थिए।
यसलाई इरानमा श्रद्धा व्यक्त गर्ने परम्परागत अभ्यास मानिन्छ।
विश्लेषकहरूका अनुसार अमेरिकासँगको युद्धको सम्भावित स्थायी अन्त्यका लागि हुन सक्ने वार्तामा इरानको कडा अडान तय गर्न वाहिदी प्रभावशाली भूमिकामा छन्।
उनलाई नयाँ सर्वोच्च नेता अयातुल्ला मोज्ताबा खामेनीसँग प्रत्यक्ष सम्पर्कमा रहेको सीमित समूहका सदस्यमध्ये एक भएको विश्वास गरिएको छ।
मोज्ताबा खामेनी फेब्रुअरी २८ मा इजरायली आक्रमणमा घाइते भएका थिए भने उनका पिता अली खामेनी मारिएका थिए।
युद्ध सुरु हुनुभन्दा केही साताअघि फेब्रुअरी ८ पछि वाहिदी सार्वजनिक रूपमा नदेखिएकाले उनको उपस्थितिलाई विशेष महत्त्वका साथ हेरिएको छ।
इरानको सरकारी सञ्चारमाध्यमले प्रसारण गरेको भिडिओमा तेहरानस्थित हुसिनियाह परिसरमा राखिएको खामेनीको कफिन रातो ट्युलिपले सजाइएको देखिन्छ।
कफिनमाथि सिया समुदायमा विशेष महत्त्व राख्ने ‘या हुसेन’ लेखिएको सेतो सुलेखनसहितको रातो झण्डा ओढाइएको थियो।
उक्त झण्डालाई अन्यायपूर्ण रूपमा मारिएका व्यक्तिको रगत तथा प्रतिशोधको प्रतीकका रूपमा समेत लिइन्छ र इराकको कर्बलास्थित इमाम हुसेनको पवित्र मजारमाथि पनि फहराइने गरिन्छ।
शनिबार खामेनीको अन्त्येष्टि कार्यक्रम सुरु गर्ने तयारी गरेको छ।
उनको पार्थिव शरीर इरान र छिमेकी इराकका विभिन्न सहरमा लगिने कार्यक्रम तय गरिएको छ।
अन्त्येष्टि तेहरानको ग्रान्ड मोसल्लाबाट सुरु हुनेछ।
त्यहाँ शोक समारोहका कारण सडक तथा दैनिक जनजीवन प्रभावित हुने अपेक्षा गरिएको छ।
दशकमै पश्चिमसँग टकरावपूर्ण नीति अपनाउँदै इरानको नेतृत्व गरेका खामेनीप्रति अन्तिम श्रद्धाञ्जली अर्पण गर्न ठुलो सङ्ख्यामा शोकाकुल नागरिक सहभागी हुने सरकारी अधिकारीहरूले जनाएका छन्।
प्रतिक्रिया