युनिकोड
इरानस्थित अमेरिकी भर्चुअल दूतावासले आफ्ना नागरिकका लागि सुरक्षा सतर्कता जारी गरेको छ।
सूचनाअनुसार इरानमा सडक बन्द, सार्वजनिक यातायात र इन्टरनेट अवरोध जारी छन्।
सूचनामा भनिएको छ, ‘इरान सरकारले मोबाइल फोन, ल्यान्डलाइन र राष्ट्रिय इन्टरनेट नेटवर्कमा प्रतिबन्ध लगाएको छ। एयरलाइन्सहरूले इरान आउने-जाने उडान सीमित वा रद्द गरिरहेका छन्।’
अमेरिकी भर्चुअल दूतावासले इरानमा रहेका आफ्ना नागरिकलाई सञ्चारका वैकल्पिक माध्यम अपनाउन तथा सुरक्षित छ भने आर्मेनिया वा टर्की हुँदै इरानबाट बाहिरिन सल्लाह दिएको छ।
यसैबिच आज ओमानमा इरान र अमेरिका वार्ता गर्दै छन्।
त्यसका लागि इरानका विदेशमन्त्री अब्बास अराघ्ची ओमान पुगिसकेको बीबीसीले जनाएको छ।
उनले आज ओमानको राजधानी मस्कटमा अमेरिकी दूतहरूसँग वार्ता गर्नेछन्।
अमेरिकाका राष्ट्रपति डोनाल्ड ट्रम्पले इरानले आफ्नो आणविक कार्यक्रम सीमित गर्न नयाँ सम्झौता नगरे सैन्य कारबाही गर्ने धम्की दिइरहेका छन्।
इरानले आणविक मुद्दामा छलफल गर्न इच्छुक रहेको बताएको छ, तर आफ्नो क्षेप्यास्त्र कार्यक्रम सीमित गर्नेजस्ता मागमा सम्झौता नहुने अडान लिइरहेको छ।
ह्वाइट हाउसका प्रेस सचिव क्यारोलिन लेभिटले राष्ट्रपति ट्रम्पले सम्झौतामा पुग्न सकिन्छ कि भनेर हेर्न इरानका अधिकारीसँगको वार्ताको निगरानी गरिरहेको बताएकी छन्।
प्रतिक्रिया