युनिकोड
चीनले राज्य नियन्त्रित सम्पत्ति व्यवस्थापन कम्पनीका पूर्वकार्यकारीलाई भ्रष्टाचार कसुरमा मङ्गलबार मृत्युदण्ड दिएको चिनियाँ सरकारी सञ्चारमाध्यमहरूले जनाएका छन्।
चिनियाँ हुआरोङ इन्टरनेसनल होल्डिङ्स (सीएचएच) का पूर्वमहाप्रबन्धक बाई तियानहुईलाई सन् २०१४ देखि सन् २०१८ को बीचमा परियोजनाहरूको अधिग्रहण र वित्तपोषणमा अनुकूल व्यवहार गर्ने क्रममा १५६ मिलियन डलरभन्दा बढी रकम स्वीकार गरेको मुद्दामा दोषी ठहर गरिएको हो।
सीएचएच चाइना हुआरोङ एसेट म्यानेजमेन्टको सहायक कम्पनी हो, जसले देशको सबैभन्दा ठूलो सम्पत्ति व्यवस्थापन कोषका रूपमा खराब ऋण व्यवस्थापनका बारेमा चासो राख्छ।
ह्वारोङ राष्ट्रपति सी चिनफिङको वर्षौं लामो भ्रष्टाचारको दमनको एक प्रमुख लक्ष्य भएको छ र यसका पूर्वअध्यक्ष सियाओमिनलाई सन् २०२१ जनवरीमा २५ करोड ३० लाख डलरको घुस लिएको कसुरमा मृत्युदण्ड दिइएको थियो।
अन्य धेरै हुआरोङ अधिकारीहरू पनि भ्रष्टाचारविरोधी अनुसन्धानमा फसेका छन्।
चीनमा भ्रष्टाचारका लागि मृत्युदण्डको सजाय प्रायः दुई वर्षको छुटका साथ जारी गरिन्छ र त्यसपछि आजीवन कारावासमा परिवर्तन गरिन्छ।
उत्तरी शहर तियानजिनको अदालतले सन् २०२४ मेमा पहिलोपटक सुनाएको बाईको सजाय निलम्बन गरिएको थिएन।
उनले आफ्नो सजायविरुद्ध अपिल गर्नुभएको थियो तर मूल फैसलालाई फेब्रुअरीमा सदर गरिएको थियो।
चीनको सर्वोच्च अदालत सुप्रिम पिपुल्स कोर्टले समीक्षापछि निर्णयको पुष्टि गर्दै बाईको अपराध ‘अत्यन्त गम्भीर’ भएको बताएको छ।
'बाईले असाधारण रूपमा ठूलो रकम घुस स्वीकार गरेकाले उहाँको अपराधको अवस्था असाधारण थियो। यसको सामाजिक प्रभाव विशेष थियो र राज्य र जनताको हितले असाधारण रूपमा ठूलो क्षति बेहोरेको थियो', सीसीटीभीले एसपीसीलाई उद्धृत गर्दै लेखेको छ।
मङ्गलबार बिहान तियानजिनमा नजिकका आफन्तहरूसँग भेटेपछि उनलाई मृत्युदण्ड दिइएको थियो तर उनलाई कसरी मृत्युदण्ड दिइयो भन्ने खुलाएको छैन।
चीनले मृत्युदण्डको तथ्याङ्कलाई राज्यको गोप्य रूपमा वर्गीकृत गरेको छ, यद्यपि एम्नेस्टी र अन्य अधिकारवादी समूहहरूले देशमा हरेक वर्ष हजारौँ मानिसहरूलाई मृत्युदण्ड दिने गरेको विश्वास गर्छन्।
बाई चीनको वित्त उद्योगमा भ्रष्टाचारविरुद्ध लामो समयदेखि चलिरहेको कारबाहीमा सजाय भोग्ने पछिल्लो उच्च पदका व्यक्ति हुन्।
चीनको शीर्ष सेक्युरिटिज रेगुलेटरका पूर्वप्रमुख यी हुइमानलाई गत सेप्टेम्बरमा भ्रष्टाचारको आरोपमा छानबिनको दायरामा राखिएको थियो।
गत मार्चमा सरकारी स्वामित्वको बैङ्किङ कम्पनी एभरब्राइट ग्रुपका पूर्वप्रमुख ली सियाओपेङलाई ६ करोड युआनको घुस लिएको कसुरमा १५ वर्षको जेल सजाय सुनाइएको थियो।
बैङ्क अफ चाइनाका पूर्वअध्यक्ष लिउ लियान्गेलाई सन् २०२४ नोभेम्बरमा दुई वर्षको छुटसहित मृत्युदण्डको सजाय सुनाइएको थियो।
भ्रष्टाचारविरोधी अभियानले स्वच्छ शासनलाई बढावा दिएको अभियानका समर्थकहरूले बताएका छन् तर आलोचकहरू यसले सीलाई राजनीतिक प्रतिद्वन्द्वीहरूलाई सफाया गर्ने शक्ति प्रदान गरेको मात्र देख्छन्।
प्रतिक्रिया