युनिकोड
इरानले इजरायल र मध्यपूर्वमा रहेका अमेरिकी अड्डाविरुद्ध युद्ध सुरु भएयताकै ठुलो आक्रमण थालिएको दाबी गरेको छ।
इरानको सरकारी सञ्चारमाध्यमका अनुसार इरानले इजरायल र मध्यपूर्वमा रहेका अमेरिकी सैन्य अड्डामा ब्यालिस्टिक क्षेप्यास्त्र प्रहार गरेको हो।
इरानले अमेरिकी प्रविधि कम्पनीका कार्यालय र डेटा सेन्टरलाई पनि निसाउन बनाउन सक्ने बताइएको छ।
सम्भावित लक्ष्यको सूचीमा गुगल, अमेजन, माइक्रोसफ्ट, एनभिडिया, आईबीएम र ओरेकलजस्ता कम्पनी छन्।
इजरायल, दुबई र अबुधाबीमा रहेका यी कम्पनीका कार्यालय र डेटा सेन्टर पनि निसानामा पर्न सक्छन्।
इरानको आक्रमणले इजरायल र अमेरिकालाई के कति क्षति भयो भन्ने विषयमा अहिले रिपोर्ट आइसकेको छैन।
यसैबिच संयुक्त राष्ट्र संघको सुरक्षा परिषद्ले आज इरानलाई बहराइन, कुवेत, ओमान, कतार, साउदी अरेबिया, यूएई र जोर्डनमा आक्रमण बन्द गर्न आह्वान गर्ने प्रस्तावमा मतदान गर्ने कार्यक्रम छ।
अमेरिका-इजरायले गत फेब्रुअरी २८ मा संयुक्त हवाई हमला गरी इरानका सर्वोच्च नेता अयातोल्लाह अली खामेनीको हत्या गरेयता हानाहान जारी छ।
जवाफमा इरानले इजरायल र अमेरिकी अड्डा रहेका खाडीका देशमा ड्रोन/क्षेप्यास्त्र प्रहार गरिरहेको छ।
यसैबिच अमेरिका-इजरायको आक्रमणबाट अहिलेसम्म १ हजार ३०० भन्दा बढी मानिस मारिएको र ८ हजार घर ध्वस्त भएको इरानले बताएको छ।
संयुक्त राष्ट्रसंघका लागि इरानका राजदूत अमिर सइद इरावनीका अनुसार देशका ९ हजार ६०० वटा आवासीय क्षेत्रमा आक्रमण गरिएको छ। हमलामा घर, बजार, अस्पताल, चिकित्सा केन्द्र र विद्यालय परेका छन्।
यस्तै इरानले आफूले पनि इजरायलका हाइफा, जेरुसेलम र तेल अभिभमा क्षेप्यास्त्र आक्रमण गरेको दाबी गरेको छ।
युद्धले अमेरिकी सेनालाई पनि असर गरेको छ। इरानको आक्रमणबाट अहिलेसम्म अमेरिकी सेनाका ७ जनाको मृत्यु र १४० जना घाइते भएको अन्तर्राष्ट्रिय सञ्चारमाध्यमले जनाएका छन्।
प्रतिक्रिया