युरोपेली संगठनले युक्रेनलाई दिन खोजेको ५० अर्ब डलरको सहयोग हंगेरीले रोकिदिएको छ। युक्रेनलाई ईयू सदस्यता दिनेसम्बन्धी वार्ता सुरु हुने निर्णयलगत्तै हंगेरीले यस्तो कदम चालेको हो।
‘नाइटसिफ्टको सारांशः युक्रेनलाई थप पैसा दिने कुरामा भिटो,’ हंगेरीका प्रधानमन्त्री भिक्टर अर्बानले भनेका छन्।
अर्को वर्षको सुरुदेखि युक्रेनलाई सदस्यता दिनेबारे वार्ता थालिने सहमति भएको छ। यसलाई युक्रेनी राष्ट्रपति भ्लादिमिर जेलेन्स्कीले विजयको रुपमा व्याख्या गरेका छन्।
तर, रुससँग निकट सम्बन्ध भएको हंगेरीले युक्रेनलाई ईयूको सदस्यता दिनु नहुने बताउँदै आएको छ।
ब्रसेल्समा भएको वार्ताको क्रममा केही समय अर्बान बैठकस्थल छाडेर पनि हिँडेका थिए। अन्य २६ मुलुकले मतदान अघि बढाएका थिए।
आफूले आठ घण्टासम्म ईयू साझेदारहरुसँग यस विषयमा लडेको अर्बानले बताएका छन्।
युद्ध सुरु भएयता युक्रेन अमेरिकी र युरोपेली सहयोगमा निर्भर छ। युक्रेन अमेरिकी कंग्रेसले रोकिदिएको ६१ अर्ब डलरको सहयोग प्याकेज अनुमोदन गराउने कोसिसमा पनि छ। एजेन्सी
Shares
प्रतिक्रिया