चीनलाई उछिनेर विश्वकै धेरै जनसंख्या भएको देश बन्दै भारत

विश्वको सबैभन्दा बढी जनसंख्या भएको देश चीनलाई भारतले उछिन्न लागेको रिपोर्ट सार्वजनिक भएको छ।

जनसंख्यासम्बन्धी प्रतिवेदनमा भारत चीनलाई उछिनेर विश्वको सबैभन्दा बढी जनसंख्या भएको देश बन्ने उल्लेख छ ।

संयुक्त राष्ट्र जनसंख्या कोष (यूएनएफपीए)को तथ्यांकअनुसार यो वर्ष भारतको जनसंख्या १ अर्ब ४२ करोड ८६ लाख पुग्नेछ। जबकि चीनको जनसंख्या १ अर्ब ४२ करोड ५७ लाखमा सीमित हुनेछ।

प्रतिवेदनमा ३४ करोड जनसंख्यासहित अमेरिका तेस्रो स्थानमा हुने बताइएको छ।

सन् २०२१ मा भएको जनगणनाअनुसार हाल चीनको जनसंख्या १ अर्ब ४१ करोड छ। भारतमा सन् २०११ यता जनगणना भएको छैन।

त्यसताका भारतको १ अर्ब २१ करोड रहेको थियो। १२ वर्षको अवधिमा मात्रै भारतमा २१ करोड जनसंख्या थपिएको प्रक्षेपण गरिएको छ। भारतमा पछिल्लो १२ वर्षको अवधिमा थपिएको जनसंख्या मात्रै पनि नेपालको कुल जनसंख्याभन्दा ७ गुणाले बढी हो।

यससँगै विश्वको जनसंख्या यसै वर्ष ८ अर्ब पुग्ने प्रक्षेपण गरिएको छ।