युनिकोड
चलचित्र ‘गोर्खा वारियर’को विशेष प्रदर्शनी हेरेपछि नेपाली सेनाका प्रधानसेनापति प्रभुराम शर्माले चलचित्रमार्फत गोर्खालीको वीरता प्रस्तुत भएको प्रतिक्रिया दिएका छन्।
आफ्नी श्रीमती सुनिता शर्मासँगै बसेर शुक्रबार राति चलचित्र ‘गोर्खा वारियर’को विशेष प्रदर्शनी हेरपछि शर्माले भने, ‘यो चलचित्रबारे जति सुनेको थिए, त्यति नै राम्रो पाएँ। यो चलचित्र उत्कृष्ट बनेको छ।’
चलचित्रमार्फत वीरताको कथालाई आगामी दिनमा समेत प्रस्तुत गर्न उनले निर्माता तथा निर्देशक मिलन चाम्सलगायतका निर्माण समूहलाई आग्रहसमेत गरे।
चलचित्र हेरेपछि सशस्त्र प्रहरी बलका महानिरीक्षक राजु अर्यालले पर्दामा राम्रो कथा हेर्न पाएको प्रतिक्रिया दिए।
‘गाउँ आउँदा लाहुरेलाई चिटिक्क देख्नेले यो चलचित्र हेरेपछि उनीहरुको जीवनसँग नजिक हुन् पाउने छन्। यसले उनीहरुको वीरतासँगै परिवारको कथासमेत भनेको छ,’ उनले भने, ‘स्वदेश मात्र नभई विदेशीले पनि यो कथालाई उत्तिकै रुचाउनेमा विश्वस्त छु।’
प्राविधिकरुपमा चलचित्र निकै अब्बल बनेको प्रतिक्रिया दिँदै उनले सम्पूर्ण निर्माण समूहलाई बधाईसमेत दिए। निर्देशक चाम्सले दर्शकबाट प्रतिक्रियाले आफूमा ऊर्जा थपेको बताए।
‘म आफैँ पूर्वगोर्खा सैनिक भएकाले यसलाई एकदशकको मेहनतमा बनाएको हुँ। यस्ता चलचित्र पैसाभन्दा पनि चाहनाले बन्छ। अब हामीले हाम्रो कथा भन्न सुरू गर्नुपर्छ भनेर सुरुआत गरेँ’, निर्देशक चाम्सले भने, ‘मलाई नेपाली आर्मीको वीरताको कथा पनि पर्दामा ल्याउन मन छ। हाम्रो वीरतासँग विश्वसँगै अहिलेको पुस्तालाई चलचित्रको माध्यमले परिचित गराउनु आवश्यक छ।’
यो चलचित्रलाई यही भदौ २४ मा बेलायतको प्रतिष्ठित आइम्याक्स सिनेवर्ल्डमा विशेष प्रदर्शनी गर्न लागिएको छ।
‘हलिउड र बलिउडका चलचित्र प्रिमियर हुने स्थानमा रातो कार्पेटमा नेपाली कलाकारलाई हिँडाएर विदेश प्रदर्शनको आरम्भ गर्दैछौँ। जहाँ बेलायती सेनाको ‘द ब्याण्ड अफ द ब्रिगेड अफ गुर्खाज’ ले प्रस्तुति दिने छन्। यस्ता गतिविधिले हाम्रो चलचित्र र हाम्रो कथालाई विश्वसामु पु¥याउन मद्दत गर्नेछ,’ उनले भने।
सन् १९४९ मा मलाया जङ्गलमा बेलायती सेनामा आबद्ध गोर्खा सैनिकले लडेको लडाइँको कथामा बनेको ‘गोर्खा वारियर’को आयोजित विशेष प्रदर्शनीमा नेपाली सेनाका उच्च पदस्थ व्यक्तित्वसँगै सशस्त्र प्रहरी बलका पूर्वमहानिरीक्षक दुर्जकुमार राई, निर्माता सुमन राई, लेखक तथा सहायक निर्देशक गिरिराज घिमिरे, सम्पादक मिलन श्रेष्ठको, छायाङ्कन निर्देशक सुदीप बराल, द्वन्द्व निर्देशक हिमाल केसी, सञ्चारकर्मी नरेश भट्टराईलगायत उपस्थिति थियो।
नेपाली, अङ्ग्रेजी र हिन्दी भाषामा प्रदर्शन गर्ने तयारी रहेको चलचित्रमा रितेश चाम्स, विजय लामा, रेविका गुरुङ, रियर राई, शिशिर बाङ्देल, कविता आले, विरुप घले, सारा राईलगायतका कलाकारले अभिनय गरेका छन्। रासस
प्रतिक्रिया