युनिकोड
मोरङको विराटनगर महानगरपालिकाको प्रमुखमा सत्ता गठबन्धनका साझा उम्मेदवारले अग्रता बढाउँदै लगे पनि उपप्रमुखका उम्मेदवार भने पछि परेका छन्।
मंगलबार साढे ७ बजे सार्वजनिक मतपरिणाम अनुसार गठबन्धनका तर्फबाट प्रमुखका उम्मेदवार नेपाली कांग्रेसको नागेश कोइराला ९ हजार ८८२ मतका साथ अग्रस्थानमा छन्।
उनलाई नेकपा एमालेका उम्मेदवार सागरकुमार थापाले ७ हजार ६३० मतले पछ्याइरहेका छन्। स्वतन्त्र उम्मेदवार उमेश यादव ३ हजार २३६ मतसहित तेस्रो स्थानमा छन्।
राष्ट्रिय प्रजातन्त्र पार्टी (राप्रपा) ले प्रह्लादप्रसाद साह हलुवाई २ हजार ९४ मतसहित तेस्रो स्थानमा छन्।
महानगरको उपप्रमुखमा भने गठबन्धनका तर्फबाट जनता समाजवादी पार्टी (जसपा) का उम्मेदवार अमरेन्द्र यादव ५ हजार ४०६ मतका साथ दोस्रो स्थानमा छन्।
एमालेका उम्मेदवार शिल्पा कार्की ८ हजार ६९० मतले उनीभन्दा अगाडि छन्। यहाँ राप्रपाका उम्मेदवार विन्दाकुमारी लुइटेल आचार्य २ हजार ५२७ मतले तेस्रो स्थानमा छन्।
उपप्रमुखमा स्वतन्त्र उम्मेदवारी दिएकी नमिता न्यौपानेले १ हजार ८९१ मत ल्याएकी छन्। विराटनगरमा अहिलेसम्म ३१ हजार ४०५ मत गणना भइसकेको छ।
प्रतिक्रिया