विश्वका धनी इलोन मस्कले चर्चित अमेरिकी विद्युतीय कार निर्माता टेस्लाको ७९ लाख कित्ता सेयर बिक्री गरेका छन्।
झण्डै ८० लाख कित्ता सेयर बिक्री गरेर उनले ६ अर्ब ९० करोड अमेरिकी डलर संकलन गरेका छन्।
अमेरिकी धितोपत्र तथा विनिमय आयोगमा मंगलबार पेस गरिएको कागजातबाट गत शुक्रबार मस्कले सेयर बिक्री गरेको विवरण बाहिर आएको हो।
अप्रिलयता मस्कले टेस्लाको सेयर बिक्री गरेको पहिलोपटक हो। त्यतिखेर उनले ९६ लाख कित्ता सेयर बिक्री गरी आठ अर्ब ५० करोड डलर उठाएका थिए। अप्रिलमा ट्विटर किन्ने सम्झौता हुँदा उनले बिक्री गरेका थिए।
तर एक महिनाअघि मात्रै उनले ट्विटर नकिन्ने बताएका थिए। उनले ट्विटरमा रहेका झूटा खाताबारे विवरण नदिएको भन्दै नकिन्ने बताएका थिए।
त्यसयता मस्क र ट्विटरबीच कानुनी विवाद सुरु भएको छ। अप्रिलमा सेयर बिक्री गर्दा मस्कले अब अरु सेयर बिक्री नगर्ने बताएका थिए।
यो वर्ष ट्विटरको सेयर मूल्यमा झण्डै २० प्रतिशत कमी आएको छ। तर पछि १४ प्रतिशतले उकालो समेत लागेको छ।
Shares
प्रतिक्रिया