गोल्छा अर्गनाइजेसन र लक्ष्मी ग्रुपबीच एउटै चिनियाँ ब्रान्डमा ‘प्राइस वार’ सुरु भएको छ।
चिनियाँ ब्रान्ड केयीमा २ ठूला घरानासहित ३ वटा आधिकारिक बिक्रेता नियुक्त हुँदा ‘प्राइस वार’ सुरु भएको हो।
नेपालमा पेट्रोल/डिजेलका गाडी बिक्री स्वाट्टै घटेको छ। चिनियाँ ब्रान्ड ल्याउन हानथाप भइरहेका बेला एउटै ब्रान्ड ल्याएका २ घरानाले मूल्यमा प्रतिस्पर्धा सुरु गरेका छन्।
चिनियाँ उत्पादक कम्पनीले नेपालमा केयी ब्रान्डको आधिकारिक बिक्रेता लक्ष्मी र गोल्छाबाहेक एलआरआरलाई समेत दिएको छ।
एलआरआरले गाडी सार्वजनिकको तयारी गरिसकेको छैन।
लक्ष्मी ग्रुपले नक्साल भाटभटेनी छेउमा शोरुम खोली सफ्ट लञ्च गरिसकेको छ। ग्राहकले बुकिङ र टेस्ट ड्राइभ गर्न सक्छन्। गोल्छा अर्गनाइजेसनले गाडी ल्याउने तयारीसँगै मूल्य सार्वजनिक गरिसकेको छ।
लक्ष्मी ई मोबिलिटीले नेपालमा गाडी सार्वजनिक गर्दा फ्ल्यागसिप भेरियन्टको ५२ लाख ९६ हजार मूल्य हुने उल्लेख गरेको थियो। बिहीबार शोरुम र गाडीको बुकिङ खुलाउँदै सुरुवाती मूल्य घटाएको छ।
लक्ष्मी ग्रुपले फ्ल्यागसिप भेरियन्टको मूल्य ४८ लाख ९६ हजार रुपैयाँ तोकेको छ भने डिलक्स भेरियन्टको ४६ लाख ९६ हजार रुपैयाँ तोकेको छ।
गोल्छा अर्गनाइजेसनअन्तर्गतको जिओ अटोमोबाइल्सले फ्ल्यागसिप मोडलको मूल्य ४८ लाख ९९ हजार रुपैयाँ हुने सार्वजनिक गरेको छ।
एउटै भेरियन्टमा प्रतिस्पर्धा हुँदा करिब ३ लाख रुपैयाँ नै घटेको छ। डिलक्सको मूल्य जिओ अटोमोबाइल्सले ४६ लाख ९९ हजार रुपैयाँ तोकेको छ।
बिहीबार सार्वजनिक गरेको मूल्यमा लक्ष्मी ग्रुपले २ वटै भेरियन्टमा ३ हजार कम मूल्य राखेको छ। नाडा अटो शोमा लक्ष्मी ई मोबिलिटीले केयीको ब्रान्ड प्रदर्शनीमा राख्न स्टल दर्ता गराइसकेको छ।
कस्तो छ केयी एक्स प्रो?
केयी एक्स ३ प्रोको रेञ्ज ४०१ किलोमिटर रहेको कम्पनीले जनाएको छ। यसबाहेक १२० किलोवाटको मोटर पावर रहेको गाडीमा ५३.६ किलोवाटआवर ब्याट्री छ। गाडीको स्पिड प्रतिघण्टा अधिकतम १५० किमि रहँदा ९ सेकेन्डमा ० बाट १०० किमिको गति लिनसक्छ।
एक्स ३ प्रोको ग्राउन्ड क्लियरेन्स १८२ एमएम छ। ५ सिटे गाडीमा फास्ट चार्जरबाट ५० मिनेटमा फुल चार्ज हुन्छ भने नर्मल चार्जरबाट ८ घण्टा लाग्छ।
गाडीमा २ वटा मोड छ। इको र स्पोर्टस मोडमा गाडी कुदाउन सकिन्छ। २ वटा मोडलमा फ्ल्यागसिपको टायर साइज १७ इन्च र डिलक्सको १८ इन्च छ।
कस्ता छन् सुरक्षा फिचर?
४४४३ एमएम लम्बाइ, १८३१ एमएम चौडाइयुक्त गाडीमा पर्याप्त मात्रामा सुरक्षा फिचरहरु छन्।
यसअनुसार अगाडि सिटबेल्टसहित अग्लो र होचो बनाउन मिल्ने सुविधा छ। यसबाहेक थ्रि प्वाइन्ट्सको आफैँ लक हुने बेल्ट अगाडि र पछाडि दुवैतिर छ। बालबालिकाका लागि आईएसओ फिक्स चाइल्ड सेफ्टी सिट इन्टरफेस, ड्राइभरले सिटबेल्ट नलगाएमा सम्झाउने फिचर, चाइल्ड प्रोटेक्टर रियर डोर लक, अगाडि दुवैतिर एयरब्याग, फ्रन्ट रो साइड एयरब्याग रहेको छ।
त्यसैगरी स्पिड सेन्सिटिभ अटोलक, पेडिस्ट्रियन रिमाइन्डर, टायर तातेको थाहा हुने र प्रेसर अनुगमन गर्ने प्रणाली, बडी थेप्ट अलार्म, रिभर्सिङ रेडार प्रोब्स, स्पिड लिमिट रिमाइन्डर, लिमिट सेटिङजस्ता नवीनतम फिचर रहेका छन्।
गाडीमा धेरैखाले गतियुक्त इलेक्ट्रिक पावर स्टियरिङ, एबीएस र ईबीडी, इलेक्ट्रोनिक ब्रेक असिस्ट (ईबीए), हिल डिसेन्ट कन्ट्रोल (एचडीसी), हिल स्टार्ट असिस्ट कन्ट्रोल (एचएचसी), बडी स्टेबिलिटी कन्ट्रोल (ईएसपी), अटो होल्ड, इलेक्ट्रोनिक पार्किङ ब्रेक (ईपीबी), अगाडि भेन्टिलेटेट डिस्क ब्रेक र पछाडि रियर सलिड डिस्क ब्रेक राखिएका छन्।
Shares
प्रतिक्रिया