युनिकोड
झापाको परम्परागत कृषि क्षेत्रलाई आधुनिक, व्यावसायिक र जलवायु-अनुकूल बनाउन चिनियाँ विशेष परियोजना सुरु भएको छ।
चीनको छोङछिङ महानगर जनसरकार र छोङछिङ महानगर कृषि तथा ग्रामीण मामिला ब्युरो/आयोगका दर्जनौँ वरिष्ठ कृषि विशेषज्ञहरूको टोली आधुनिक प्रविधि र मेसिनरीसहित झापा आइपुगेपछि यो परियोजना अघि बढेको छ।
चीन–दक्षिण एसिया गरिबी निवारण तथा विकास सहयोग केन्द्रको भाइब्रेन्ट भिलेज अभियान नाम दिइएको यो परियोजना झापाको विर्तामोडमा शुभारम्भ गरिएको थियो। सो ठाउँमा आधुनिक उपकरणको जडान कार्य सम्पन्न भइसकेको छ। चिनियाँ प्राविधिकहरूले मेसिनको प्रभावकारी उपयोग सुनिश्चित गर्न स्थानीयलाई सञ्चालन तालिम समेत दिएका छन्।
परियोजना अन्तर्गत हालसम्म १२० भन्दा बढी स्थानीय किसानहरूले उन्नत भैँसी र गाई पालन प्रविधि तथा आधुनिक मत्स्य पालनको व्यावहारिक तालिम प्राप्त गरिसकेका छन्। परियोजनाको दीर्घकालीन प्रभाव र निरन्तरता सुनिश्चित गर्न आगामी दिनमा पशुदाना उत्पादनका लागि वैज्ञानिक मकै खेती प्रविधि, हरियो घाँस सुरक्षित राख्ने साइलेज प्रविधिको तयारी र भण्डारण विधि, तथा परिमार्जित र आधुनिक फार्म व्यवस्थापन अभ्यासमा थप प्रशिक्षण सञ्चालन गरिनेछ।
यो बृहत् परियोजनालाई चाइना फाउन्डेसन फर रुरल डेभलपमेन्ट सिएफआरडी नेपाल कार्यालयले स्थानीय विर्तामोड र अर्जुनधारा नगरपालिकाको सरकारसँगको प्रत्यक्ष समन्वय र सहकार्यमा कार्यान्वयन गरिरहेको छ। सिएफआरडी नेपाल कार्यालयकी निर्देशक जोउ जिछियाङका अनुसार यो परियोजना एक प्रदर्शन मोडेल हो। यसले नेपाली किसानलाई तरकारी, हाइब्रिड धान, पशुपन्छी र मत्स्य पालन क्षेत्रमा चीनले गरिबी निवारणमा हासिल गरेका ऐतिहासिक उपलब्धिहरू प्रत्यक्ष देखाउनेछ। साथै, स्थानीय समुदायकै नेतृत्वमा चल्ने दिगो र जलवायु-अनुकूल कृषि प्रणाली निर्माणमा यसले मोडेलको रूपमा काम गर्नेछ।
चिनियाँ कृषि विशेषज्ञ झाईले कार्यथलोमै कृषि मेसिनरी जडान गर्नुका साथै पशुपन्छी, मत्स्य पालन, कृषि उपजको कटानीपछिको उचित व्यवस्थापन, र एकीकृत तरकारी खेती प्रणालीका उन्नत प्रविधिबारे जानकारी दिए। जसको उद्देश्य समुदायमा आधारित कृषि-आर्थिक क्षमतालाई बलियो बनाउनु हो। परियोजनाले मुख्य रूपमा चीनको आधुनिक यान्त्रिक पशुपन्छी र मत्स्य पालन प्रणालीको सुरुवात, कृषि फार्म व्यवस्थापन अभ्यासमा सुधार, र किसानहरूलाई व्यावहारिक प्राविधिक सीप प्रशिक्षण दिने कार्यमा जोड दिनेछ। यसबाट नेपालको परम्परागत पशुपालन र जलकृषि क्षेत्रलाई दिगो र आधुनिक उद्योगका रूपमा विकास गर्न दीर्घकालीन मद्दत पुग्ने विश्वास लिइएको छ।
परियोजनाको मुख्य उद्देश्य नेपालमा आधुनिक चिनियाँ पशुपन्छी पालन, उन्नत जातका दुधालु भैंसी र वैज्ञानिक माछा पालन प्रविधि भित्र्याएर नेपाली किसानहरूको आम्दानी बढाउनु र ग्रामीण जीवनस्तरमा सुधार ल्याउनु हो। परियोजना उद्घाटन समारोहलाई प्रतिनिधि सभाका पूर्व सभामुख देवराज घिमिरे, कोसी प्रदेशका खानेपानी, सिँचाइ तथा ऊर्जा मन्त्री चिन्तन पाठक, र कोसी प्रदेशको कृषि विकास मन्त्रालयका अधिकारी इसराइल मसुरीले सम्बोधन गरे।
कार्यक्रममा नेपालस्थित चिनियाँ दूतावासका प्रतिनिधि र सिएफआरडीका अधिकारी कोसी प्रदेश सरकार र स्थानीय तहका अधिकारीहरूको सहभागिता थियो। समारोहमा बोल्दै पूर्व सभामुख घिमिरे, मन्त्री पाठक र इसराइल मसुरीले चोङ्चिङका कृषि विशेषज्ञहरू हजारौँ माइलको दुरी तय गरेर उन्नत प्रविधि सिकाउन नेपाल आएकोमा कृतज्ञता व्यक्त गरे।
चोङ्चिङ सरकारको यो उदार सहयोग र विशेषज्ञहरूको निःस्वार्थ योगदानको उच्च प्रशंसा गर्दै चीनबाट ल्याइएका दर्जनौँ अत्याधुनिक कृषि मेसिनहरूले कोसी प्रदेशका जनतामा आधुनिकीकरणको नयाँ ऊर्जा र आशा जगाएको उनीहरुको भनाइ थियो।
चिनियाँ सहयोगमा संचालित यस्ता कार्यक्रमले नेपालको ग्रामीण विकास र कृषि आधुनिकीकरणमा दूरगामी महत्त्व राख्ने बक्ताहरुले बताए।
सिएफआरडी नेपालकी नेपाल निर्देशक जोउ जिछियाङले सन् २०२३ मा चिनियाँ कृषि विशेषज्ञहरूको टोलीले झापामा गरेको विस्तृत स्थलगत मूल्यांकनका आधारमा यो परियोजना विकास गरिएको जानकारी दिइन्। उक्त अध्ययनले झापामा पशुपन्छी र मत्स्य पालनको प्रचुर सम्भावना देखाएपछि कार्यक्रम ल्याएको उनले बताइन्।
भाइब्रेन्ट भिलेज इनिसिएटिभको फ्रेमवर्क अन्तर्गत चाइना फाउन्डेसन फर रुरल डेभलपमेन्ट नेपालले झापामा पशुपन्छी तथा मत्स्य पालन विकास परियोजना, चितवनमा हाइब्रिड धान खेती प्रदर्शन कार्यक्रम, र ललितपुर तथा दक्षिणकालीमा अत्याधुनिक हरितगृह तरकारी खेती प्रणाली समावेश छन्। यी प्रयासहरूले प्रविधि हस्तान्तरणलाई जगैदेखिको क्षमता निर्माण, ग्रामीण नवप्रवर्तन र आधुनिक कृषि विकाससँग जोड्ने एक एकीकृत रणनीतिलाई प्रतिबिम्बित गर्दछन्।
यसैगरी, सीएफआरडीले सामाजिक उत्तरदायित्व अन्तर्गत दमक क्षेत्रका १० वटा सरकारी विद्यालयहरूलाई अतिरिक्त क्रियाकलापका लागि खेलकुदका सामग्रीहरू समेत वितरण गरेको छ। समारोहको अन्त्यमा किसानहरू र चिनियाँ प्राविधिक विशेषज्ञहरूबीच कृषि फार्मको स्थलगत भ्रमण तथा सघन अन्तर्क्रियात्मक संवाद भएको थियो।
प्रतिक्रिया