युनिकोड
ऊर्जा, जलस्रोत तथा सिँचाइ, भौतिक पूर्वाधार तथा यातायात र सहरी विकासमन्त्री कुलमान घिसिङले वर्षौंदेखि काम नगरेर रुग्ण ठेक्का तोड्नु बाध्यता रहेको बताएका छन्।
सडक बोर्ड, नेपालको २३औँ वार्षिकोत्सवको अवसरमा मंगलबार राजधानीमा आयोजित कार्यक्रममा मन्त्री घिसिङले काम गरिएन भने कारबाही हुन्छ भन्ने सन्देश दिन, कम रकम कबोल गरी ठेक्का हात पार्ने प्रवृत्तिलाई निरुत्सहित गर्न, समयमै निर्माण नगरिएका कारण आमनागरिकले पाइरहेको दु:खको अन्त्यका लागि ठेक्का तोड्नु बाध्यता रहेको उल्लेख गरेका हुन्। सडक विभागले हालसम्म ४० वटा रुग्ण ठेक्का तोडेको छ।
नियोजित रुपमा कुनै पनि ठेक्का नतोडिएको प्रस्ट पार्दै मन्त्री घिसिङले आफूले लिएको ठेक्काको काम समयमै सम्पन्न गर्ने निर्माण व्यवसायीलाई प्रोत्साहन गरिएको बताए।
उनले विकास बजेट निर्माण व्यवसायीमार्फत खर्च हुने भएकाले देश विकासमा निर्माण व्यवसायीको ठूलो योगदान रहेकाले उनीहरुको क्षमता एवम् दक्षता अभिवृद्धिमा जोड दिए।
संघ, प्रदेश र स्थानीय तहले सडक निर्माण तथा मर्मत गरिरहेकाले आम नागरिकले कुन सडकमा कसको क्षेत्राधिकार रहेको थाहा नपाएका कारण सडक भनेको सडक विभागले नै बनाउने हो भन्ने बुझ्दा संघ सरकारप्रति धेरै आक्रोश आउनुका साथै अपेक्षा पनि राख्ने गरेको उनले टिप्पणी गरे। साथै, उनले सडक मर्मतसम्भारलाई नियमित रुपमा तदारुकताका साथ गर्न निर्देशन दिए।
सडक पूर्वाधारको मर्मतसम्भार तथा संरक्षण खर्च व्यवस्थापन गर्न ‘सेवाका लाथि दस्तुर’ सिद्धान्तअनुरुप बोर्डले उपभोक्ताबाट दस्तुर उठाई वित्तीय व्यवस्थापन गरिने अवधारणालाई विस्तार गर्दै लैजाने जनाएको छ।
सडक पूर्वाधारको योजनाबद्ध एवम् प्रभावकारी ढंगबाट मर्मतसम्भारका लागि आवश्यक स्रोतको दिगो व्यवस्थापन गर्न बोर्डको स्थापना भएको हो। बोर्डले हाल भैरहवा–भुमही सडकअन्तर्गत भैरहवाको वसन्तपुरस्थित टोलबुुाट विद्युतीय प्रविधिका सडक उपभोग दस्तुर (टोल) संकलन गरिरहेको छ।
प्रतिक्रिया