युनिकोड
प्रभु म्यानेजमेण्ट प्रालिका पूर्वसेयरधनी तथा प्रभु म्यानेजमेण्ट प्रालिका लेखा शाखामा कार्यरत एक जना पक्राउ परेका छन्।
प्रहरीको केन्द्रीय अनुसन्धान ब्युरो (सीआईबी) ले काभ्रेपलाञ्चोकको पनौती नगरपालिका ८ पनौती घर भई हाल ललितपुरको गोदावरी नगरपालिका ३ टौखेल बस्ने ५१ वर्षीय हेमकुमार महाजुलाई पक्राउ गरेको हो।
उनी हुण्डीमार्फत रकम जम्मा भएको सिटिजन्स बैंकमा रहेको प्रभु म्यानेजमेण्ट प्रालिको खाता संचालक मध्येका एक हुन्।
यसअघि सीआईबीले यही कसुरमा नेकपा एमालेका पूर्वसांसद एवम् प्रभु ग्रुपका सञ्चालक देवीप्रसाद भट्टचनलाई पक्राउ गरेको थियो।
ठाकुरप्रसाद मानन्धर लगायतले जाहेरी दिएपछि सीआईबीले कुसुम लामा समेत माथि ठगी, आपराधिक विश्वासघात तथा आपराधिक लाभ र नेपाल राष्ट्र बैंक ऐन, २०५८ अन्तर्गतको कसूरमा लामो समयदेखि अुसन्धान गरिरहेको थियो। यही कसुरमा भट्टचन र महाजु पक्राउ परेका सीआईबीका प्रवक्ता एसएसपी शिवकुमार श्रेष्ठले बताए।
अनुसन्धानको क्रममा प्रभु म्यानेजमेन्ट प्रालिको नाममा रहेको सिटिजन बैंकको खातामा विभिन्न व्यक्तिहरूको नामबाट शंकास्पद रूपमा ९ लाख ९९ हजार ५ सय रुपैयाँका दरले पटक पटक रकम जम्मा गरेको पाइएको छ।
शंकास्पद रूपमा रकम जम्मा भएको, रेमिट कारोबारको क्रममा प्रभु म्यानेजमेण्ट प्रालिले रेमिट रकम भुक्तानी मात्र गर्नु पर्नेमा प्रस्तुत कारोवारमा एकै दिनमा पटक पटक शंकास्पद रकम जम्मा भएको देखिएको, प्रभु म्यानेजमेन्ट प्रालिको नाममा सञ्चालन भएको सिटिजन्स बैंकको खातामार्फत रेमिट कारोबारको आवरणमा अवैध रूपमा नेपालमा विप्रेषण बापत प्राप्त हुने रकम हुण्डी मार्फत प्राप्त गरी हिसाब मिलान गरेको देखिएको सीआईबीको दाबी छ।
विदेशमा बसेका नेपालीहरुले पठाएको रकम भुक्तानी दिन सहकारी मार्फत् विप्रेषण बापतको रकम भुक्तानी गराउने गरी २०६९ पुस १ गते प्रभु म्यानेजमेन्ट प्रालि र प्रभु मनि ट्रान्फर प्रालिबीच करार सम्झौता भएको थियो।
त्यतिबेला दुवै कम्पनीका मुख्य सञ्चालक देवीप्रकाश भट्टचन थिए। प्रभु म्यानेजमेन्ट प्रालिलाई सुपर एजेण्टको रूपमा नियुक्त गरी उक्त प्रभु म्यानेजमेन्ट प्रालिका तर्फबाट तत्कालिन प्रबन्ध निर्देशक कुसुम लामाले देशभरका विभिन्न सहकारी संस्थाहरू मार्फत विप्रेषणको कारोबार गर्ने सम्झौता गरेकी थिइन्।
नेपाल राष्ट्र बैङ्क विप्रेषण विनियमावली, २०७९ २०७९ माघ १३ गते जारी भएकोमा त्यसविपरित उनीहरुले काम गरेको आरोप उनीहरुमाथि छ।
प्रभु म्यानेजमेन्ट प्रालिको सब–एजेण्टको रूपमा नियुक्त भएका देशभरका विभिन्न सहकारी संस्थाहरूले सम्बन्धित व्यक्तिलाई विप्रेषण बापतको रकम भुक्तानी गरेको तर प्रभु मनि ट्रान्फर प्रालिका अध्यक्ष देवीप्रकाश भट्टचन समेतले रकम हिनामिना गरी प्रभु म्यानेजमेन्ट प्रालिबाट सम्बन्धित सहकारी संस्थाहरूलाई उक्त रकम सोधभर्ना नगरेको आरोप छ।
देशभरका ३ दर्जनभन्दा बढि सहकारी संस्थाबाट यस विषयमा उजुरी परेको थियो।
प्रतिक्रिया