युनिकोड
राजस्व अनुसन्धान विभागले सिल्क ग्रुप र यसका अध्यक्ष रमेश शेर्पासहित १२ जनालाई अवैध भेप कारोबार गरेको आरोपमा जिल्ला अदालत ललितपुरमा मुद्दा दायर गरेको छ।
भन्सार छलेर गोदाममा राखिएको अवस्थामा ८६ हजार ४ सय थान इलेक्ट्रिक चुरोट (भेप) बरामद गरेपछि अनुसन्धान गरेको विभागले १० जनालाई मुख्य प्रतिवादी र महेश प्रसाद पाठकसहित दुई जनालाई मतियार कायम गरी २९ गते मुद्दा दायर गरेको हो।
विभागको टोलीले महालक्ष्मी नगरपालिका ४ शीतलहाइटमा रहेको गोदामबाट उक्त भेप बरामद गरेको थियो। उक्त भेप चोरी पैठारीमा ग्रुप अध्यक्ष रमेश शेर्पा र विजय शेर्पाको मुख्य भूमिका रहेको विभागले जनाएको छ। अवैध कारोबारमा ग्रुपअन्तर्गतका ७ वटा कम्पनीहरु संलग्न रहेको पाइएको छ।
भन्सार चोरी गरी राजस्व चुहावट कसुर गरेको तथ्य स्थापित भएको विभागले जनाएको छ। उक्र ग्रुप र यसअनुसारका ५ कम्पनीले मौज्दातमा रहेको ३८ हजार ९ सय २४ थान भेप बिल बीजक जारी नगरी बिक्री गरेको समेत विभागको भनाइ छ।
ग्रुपले कुल ३ लाख १६ हजार ३ सय १५ थान भेपको स्थानीय खरिद गरेको नक्कली कारोबार देखाएको समेत पाइएको छ।
विभागले प्रतिवादीहरुविरुद्ध जम्मा ८७ करोड ३१ लाख २३ हजार ८ सय २८ रुपैयाँ बिगो कायम गरी राजस्व चुहावट ऐनअनुसार बिगोको शतप्रतिशत जरिवाना समेत गरी कुल १ अर्ब ७४ करोड ६२ लाख ४७ हजार ६ सय ५७ रुपैयाँ मागदाबी गरेको छ। त्यसैगरी १० जनालाई हदैसम्मको कैद र मतियारहरुलाई मुख्य प्रतिवादीलाई हुने सजायको आधा सजाय हुन माग गर्दै अभियोगपत्र दायर गरिएको हो।
प्रतिक्रिया