युनिकोड
सरकारले चालू अधिवेशनबाटै हवाइ सेवा विधेयक पारित गर्ने दाबी गरेको छ।
नेपाल नागरिक उड्डयन प्राधिकरणसम्बन्धी कानुनलाई संशोधन र एकीकरण गर्न बनेको विधेयकलाई संसद्को यसै अधिवेशनबाट पारित गरिने उल्लेख गरेको हो।
नीति तथा कार्यक्रममा नागरिक उड्डयन नियमनलाई प्रभावकारी बनाई हवाइ सेवा सुरक्षित, सुलभ र पहुँचयोग्य बनाइने उल्लेख गर्दै हवाइ पूर्वाधार र सेवा प्रवाहमा निजी क्षेत्रको सहभागिता बढाइने बताइएको छ।
नीति तथा कार्यक्रमा आर्थिक, व्यावसायिक र वातावरणीय सम्भाव्यताका आधारमा मात्र विमानस्थल निर्माण एवम् विस्तार गरिनेछ। नेपाल वायुसेवा निगमको पुनर्संरचना गरिने उल्लेख छ।
नेपाललाई प्राकृतिक, सांस्कृतिक, साहसिक र चलचित्र पर्यटनको सुरक्षित तथा आकर्षक गन्तव्यका रूपमा विकास गरिनेछ। योग ध्यानमार्फत सकारात्मक सोचको अभिवृद्धि गरी नेपाललाई आरोग्य र ध्यान पर्यटनको आकर्षक स्थलको रूपमा प्रवर्द्धन गरिने भन्ने छ।
पर्यटन क्षेत्रलाई आयआर्जन, रोजगारी र समृद्धिको आधारको रूपमा विकास गरिनेछ। दिगो, आय तथा रोजगारीमूलक, प्रविधि र वातावरणमैत्री पर्यटन नीति अवलम्बन गरिनेछ। सार्वजनिक–निजी सहकार्यमा पर्यटनको प्रत्यक्ष लाभ स्थानीय समुदायमा पुऱ्याइनेछ ।
पर्यटकीय पूर्वाधारमा मौलिकता नवप्रवर्तनलाई प्रोत्साहित गराइनेछ। ऐतिहासिक, पुरातात्त्विक, धार्मिक र साँस्कृतिक महत्त्वका थप क्षेत्रहरूलाई विश्व सम्पदा सूचीमा समावेश गराउने पहल गरिने बताइएको छ।
प्रतिक्रिया