सगरमाथा आरोहणका क्रममा केन्याका ४० वर्षीय नागरिकको मृत्यु भएको छ।
पर्यटन विभागका अनुसार जेठ ९ गते राति साढे १० बजे ८ हजार ८३० मिटरमा केन्याका जोसु चेरुइयुत किरुई मृत फेला परेका हुन्।
उनीसँगै रहेका नेपाली माउन्टेन गाइड लिखु पिके गाउँपालिकाका ४४ वर्षीय ङवाङ शेर्पा सम्पर्कविहीन छन्।
उनले ५ गते आधारशिविरबाट आरोहण सुरु गरेका थिए। जेठ ९ गते चौथो शिविर हुँदै सगरमाथा चुचुरोतर्फ लागेका थिए।
आरोही र गाइड चुचुरो नजिकै पुगे पनि आरोहण सम्पन्न गरे/नगरेको एकीन नभएको विभागले जनाएको छ।
बुधबार दिउँसो २ बजेसम्म पनि रेडियो सम्पर्कमा नआएकाले सेभेन समिटले ४ माउन्टेन गाइड परिचालन गरी क्याम्प २ भन्दा माथि सर्च एन्ड रेस्क्यु टिम परिचालन गरेको थियो।
शेर्पाको अवस्था भने अज्ञात रहेको र खोज तथा उद्धार जारी रहेको विभागले जनाएको छ।
Shares
प्रतिक्रिया