पोखरा पुगेर अर्थमन्त्रीले भने : उद्योग खोल्न के सुविधा चाहिन्छ,  सरकार तयार छ

अर्थमन्त्री जनार्दन शर्माले सार्वजनिक खरिद ऐनमा रहेको केही प्रावधानका कारण सार्वजनिक खर्च बढ्न नसकेको जिकिर गरेका छन्। उनले प्रतिस्थापन विधेयक ढिलो आउँदा र सार्वजनिक खरिद ऐनमा रहेका केही प्रावधानका कारण हालसम्म ४.७ प्रतिशतमात्रै पूँजीगत खर्च भएको जानकारी दिए। 

‘मैले सबै मन्त्रीहरुसँग किन पूँजीगत खर्च हुन सकेन भन्नेबारे छलफल गरेको छु’,शुक्रबार पोखरा उद्योग वाणिज्य संघले आयोजना गरेको अन्तरक्रियामा बोल्दै उनले भने, ‘मेरै संयोजकत्वमा सार्वजनिक खरिद ऐन संशोधन गर्न समिति गठन भएको छ, अब खर्च बढाउने काम हुन्छ।’ 

उनले बजारमा देखिएको तरलताको समस्या सल्टाउन शुक्रबार नै २७ वटा वाणिज्य बैंकका कार्यकारी निर्देशकहरूसँग छलफल गरेको जानकारी दिँदै मन्त्री शर्माले केही दिनमै तरलताको समस्या समाधान हुने जिकिर गरे। 

मन्त्री शर्माले उत्पादनमूलक अर्थतन्त्र निर्माण नै आफ्नो लक्ष्य भएको पनि जिकिर गरे। उत्पादनमूलक उद्योगलाई राज्यले आवश्यक पर्ने सबै सुविधा दिने प्रतिवद्धता उनको रहेको थियो।

‘उद्योग खोल्न के सुविधा चाहिन्छ, त्यो दिन सरकार तयार छ’, पोखरा उद्योग वाणिज्य संघले शुक्रबार आयोजना गरेको अन्तरक्रिया कार्यक्रममा बोल्दै उनले भने, ‘भन्सार छुट चाहियो कि, बिद्युत वा कर छुट के चाहिन्छ, त्यो तत्काल दिइन्छ।’ 

उनले देशमा उत्पादित ५ सय मेघावाट बिजुली खेर जानु लज्जाको विषय भएको बताउँदै बिजुली स्वदेशमै खपत हुने अवस्था सिर्जना गर्नेतर्फ सरकार लागिरहेको दावी गरे। 

पोखरा–काठमाडौंको सडक यात्रा २ घण्टामा झार्नको लागि भौतिक पूर्वाधार मन्त्रालयसँग छलफल अघि बढाएको बताउँदै उनले भने,‘बाटो छोटिए त्यसले देशको अर्थतन्त्रमा सकारात्मक योगदान प्रदान गर्छ।’
अर्थमन्त्री शर्माले कोभिडले पीडित व्यवसायीहरुको लागि घोषित पुनःकर्जा र अनुदान वितरणको प्रभावकारिता अनुगमन थालिएको जानकारी गराउँदै साना व्यवसायीलाई अनुदान दिने प्रक्रिया सुरु भएको जानकारी गराए। 

कार्यक्रममा बोल्दै नेपाल उद्योग वाणिज्य महासंघका केन्द्री सदस्य बाबुराम गिरीले बैंकहरुले नाफामुखी भएर लागु गराएको एकाधिकार तोड्न सरकारले अझ कठोर निर्णय लिनुपर्ने बताए।

पोखरा उद्योग वाणिज्य संघ तथा कार्यक्रमका अध्यक्ष नारायण कोइरालाले पोखरा अन्तर्राष्ट्रिय विमानस्थल निर्माणमा देखिएको अवरोध हटाउन तथा यहाँबाट हुने उडान सुनिश्चित गर्न आग्रह गरे। उनले बजारमा देखिएको तरलता हटाउन, पर्यटन क्षेत्रले कोभिडविरुद्धको खोप लगाएको सकारात्मक सन्देश अन्तर्राष्ट्रिय बजारमा प्रवाह गर्न तथा व्यवसाय पुनरुत्थानका कार्यक्रमहरुलाई तीव्रता दिन आग्रह गरे।

पोखरा पर्यटन परिषद्का अध्यक्ष गोपी भट्टराईले कोभिडको मारमा परेका व्यवसायीहरु १२ प्रतिशत ब्याज तिर्न बाध्य भएको बताउँदै तरलताको समस्या छिटो समाधान गर्न माग गरे।