यचुरी, अन्य भारतीय बामपन्थी नेता पक्राउ

भारतमा जारी आन्दोलनका क्रममा त्यहाँका बामपन्थी नेताहरु सिताराम यचुरी, डी राजा, निलोत्पल बसु, ब्रिन्दा करात लगायतलाई बिहिबार नयाँ दिल्लीमा गिरफ्तार गरिएको छ।
भारतीय सरकारले हालै ल्याएको नागरिकता ऐनको विरोधमा आन्दोलन चर्कँदै गर्दा त्यहाँको प्रशासनले थप लेखक, अभियन्ता, विद्यार्थी र विपक्षी नेताहरुलाई पक्राउ गरेको हो।
‘हामीलाई भर्खरै गिरफ्तार गरिएको छ,’ भारतीय कम्युनिष्ट पार्टी (सीपीआई) का महासचिव डी राजालाई उद्धृत गर्दैै भारतीय सरकारी सञ्चार एजेन्सी पीटीआईले जनाएको छ।
त्यसअघि बिहीबार नै कैयौं प्रदर्शनकारीलाई दिल्ली कै लालकिल्लाबाट पक्राऊ गरिएको थियो।
स्वराज अभियानका प्रमुख योगेन्द्र यादवलगायतलाई त्यहाँबाट गिरफ्तार गरिएको थियो भने उता बैंगलोरबाट चर्चित इतिहासकार तथा लेखक रामचन्द्र गुहासहित अभियन्ताहरु पक्राऊ परेका थिए।