सिटिजन्स बैँकको ५ करोड हिनामिना प्रकरणः फरार कर्मचारी खोज्दै प्रहरी

सिटिजन्स बैंक इन्टरनेसनलको विराटनगर–३ मा राजबंशी चोकमा रहेको शाखाबाट करिब ५ करोड रुपैयाँ हिनामिना गरी फरार रहेकी कर्मचारीको प्रहरीले खोजी तिब्र बनाएको छ। 

बैंकका निक्षेपकर्ताहरूको मुद्दती निक्षेपलाई धितो राखी नक्कली ऋणी खडा गरेर ४ करोड ९१ लाख ५२ हजार १३ रुपैयाँ घोटाला गरेको आरोपमा तत्कालीन अपरेसन इन्चार्ज ३५ वर्षीया रोजी कँडेलविरुद्ध पक्राउ पुर्जी जारी भएको छ। प्रहरीले उनको खोजी तीव्र बनाएको हो।
बैंकको आन्तरिक लेखापरीक्षण (अडिट) का क्रममा कर्मचारीहरूकै मिलेमतोमा १३ जना नक्कली ऋणीका नाममा किर्ते कर्जा फाइल खडा गरी रकम निकालिएको तथ्य बाहिरिएको थियो।
 
यस प्रकरणमा बैंकले २८ फागुनमा जिल्ला प्रहरी कार्यालय मोरङमा उजुरी दिएपछि घटना सार्वजनिक भएको हो। हिनामिनामा संलग्नता देखिएको भन्दै बैंकले कँडेललाई बर्खास्त गरिसकेको छ भने शाखा प्रबन्धक अभिषेक अग्रवाल, सहायक प्रबन्धक जोसेफ आचार्यसहित अन्य सात जना कर्मचारीलाई अनुसन्धानको दायरामा ल्याएको छ।
 
जिल्ला प्रहरी कार्यालय मोरङका एसपी कवित कटुवालका अनुसार, बैंकले बुझाएको २५० पेज लामो छानबिन प्रतिवेदनका आधारमा बैंकिङ कसुर मुद्दामा अनुसन्धान अघि बढाइएको छ। उच्च अदालत विराटनगरले कँडेललाई पक्राउ गर्न अनुमति दिएलगत्तै प्रहरी टोली उनको खोजीमा जुटेको छ।