युनिकोड
काठमाडौँमा सरकारले नदीकिनारका अव्यवस्थित बसोबास हटाउने क्रममा विस्थापित परिवारका ५२ जना बालबालिका आजदेखि विद्यालय जान थालेका छन्।
काठमाडौँ महानगरपालिकाले दिएको जानकारीअनुसार राधास्वामी सत्संग व्यास आश्रम (होल्डिङ सेन्टर) मा राखिएका बालबालिकामध्ये ५२ जना आजदेखि वडा नं. १४ मा रहेको जनविकास माध्यमिक विद्यालयमा पढ्न थालेका हुन्।
महानगरपालिकाको शिक्षा विभागले सोमबार विद्यार्थी र अभिभावकसँग परामर्श गरेर उनीहरूको रुचि र आवश्यकता पहिचान गरेपछि आजदेखि स्कुल पठाउन थालिएको महानगरपालिकाले जनाएको छ।
नदी किनारामा अव्यवस्थित बसोबास गरिरहेका घरटहरा खाली गराउने क्रममा थापाथली, गैरीगाउँ र सिनामंगलसहित विभिन्न स्थानबाट ल्याइएका ६६ परिवारका २०३ जना अहिले राधास्वामी सत्संग आश्रममा छन्। जहाँ ५२ जना बालबालिका विद्यालय उमेरका छन्।
तीमध्ये ३० जना छात्रछात्राका अभिभावकले आफ्ना नानीबाबुलाई छात्रावासमा राखेर पढाउने चाहना राखेका छन्।
अभिभावकको चाहना बुझ्न भराइएको फाराममा ५ जना छात्रा र ६ जना छात्रले छात्रावासमा बस्न अनिच्छा व्यक्त गरेको र अन्य अभिभावकबाट स्पष्ट धारणा आइनसकेको महानगरपालिकाको भनाइ छ।
शिक्षा विभागका वरिष्ठ शाखा अधिकृत सुशील सुवेदीका अनुसार छात्रावास बस्न इच्छुकहरूमा ११ जना छात्रा र १९ जना छात्र छन्।
काठमाडौँ महानगरपालिकाका कार्यवाहक प्रमुख सुनिता डंगोलले आइतबार प्याब्सन र एनप्याब्सनका पदाधिकारीसँग बसेर होल्डिङ सेन्टरमा रहेका बालबालिकाका लागि संस्थागत विद्यालयमा आवास सुविधासहित निःशुल्क अध्ययनको व्यवस्था मिलाउन आग्रह गरेकी थिइन्।
यसपछि बैठक बसेर हाइयर इन्स्टिच्युसन्स एन्ड सेकेन्डरी स्कुल्स एसोसिएसन (हिसान), प्राइभेट एन्ड बोर्डिङ स्कुल्स अर्गनाइजेसन नेपाल (प्याब्सन), राष्ट्रिय निजी तथा आवासीय विद्यालय एसोसिएसन नेपाल (एनप्याब्सन) र एसोसिएसन अफ प्रिस्कुल एजुकेटर्स नेपाल (एपेन) ले संयुक्त विज्ञप्ति निकाली वास्तविक सुकुमवासीका बालबालिकाको शिक्षालाई निरन्तरता दिन, सहयोग र सहजीकरणका लागि तत्पर रहेको बताएका छन्।
प्रतिक्रिया