युनिकोड
मकवानपुरको भीमफेदी गाउँपालिका-६, सिमलटारमा भिरबाट लडेर महिलाको मृत्यु भएको छ।
मकवानपुर जिल्ला प्रहरी कार्यालयाका प्रवक्ता (डीएसपी) पुष्कर बोगटीका अनुसार घाँस काट्ने क्रममा भिरबाट लडेर हेटौँडा उपमहानगरपालिका-१४ नयाँबस्ती टोल निवासी नरेन्द्र मोक्तानकी श्रीमती ३५ वर्षीया सन्तोषी वाइवाको मृत्यु भएको हो।
शनिबार माइत भीमफेदी-६ सिमलटार गएकी सन्तोषी माइतीघरबाट करिब २ सय मिटर दक्षिणतर्फ रहेको खहरे खोलामा घाँस काट्न डोको लिएर निस्किएकी थिइन्।
तर लामो समयसम्म घर नफर्किएपछि आफन्तहरूले खोजतलास गर्ने क्रममा उनी सोही स्थानको भिरबाट करिब ५०/६० मिटर तल लडेर गम्भीर घाइते अवस्थामा फेला परेकी थिइन्।
उपचारका लागि शनिबार दिउँसो १२:४० बजे हेटौँडा अस्पताल लगिएकी उनलाई चिकित्सकले मृत घोषणा गरेका थिए।
घटनास्थल इलाका प्रहरी कार्यालय भीमफेदीबाट करिब ५ सय मिटर दक्षिणमा पर्छ।
कानुनी प्रक्रिया पूरा गरी शनिबारै साँझ ६ बजे मृतकका श्रीमान्लाई शव जिम्मा लगाइएको डीएसपी बोगटीले बताए।
प्रतिक्रिया