ललितपुरको ग्वार्कोमा गाडीले मोटरसाइकललाई ठक्कर दिँदा एक जनाको मृत्यु भएको छ।
ललितपुर प्रहरी परिसरका प्रवक्ता, एसपी नरेशराज सुवेदीका अनुसार बुधबार राति १० बजेआसपास ललितपुर महानगरपालिका-१७ ग्वार्कोमा प्रदेश ०२–०१–००२ प ९१७५ नम्बरको मोटरसाइकललाई गाडीले ठक्कर दिँदा मोटरसाइकलमा सवार युवकको मृत्यु भएको हो।
गाडीको ठक्करबाट सिराहा घर भई काठमाडौँको कोटेश्वरमा बस्ने गरेका ३२ वर्षीय जयनाथ यादव गम्भीर घाइते भएका थिए।
उनलाई तत्काल उद्धार गरी नजिकैको बीएन्डबी अस्पताल पुर्याइए पनि उपचारका क्रममा राति ११ बजे मृत्यु भएको एसपी सुवेदीले जानकारी दिए।
ठक्कर दिने गाडी भने पत्ता लागेको छैन। खोजी भइरहेको उनले बताए।
‘घटनास्थल आसपासका सीसीटीभी क्यामेरा फुटेज हेर्दा टिपरले ठक्कर दिएकोजस्तो देखिन्छ’, एसपी सुवेदीले नेपालखबरसँग भने, ‘हामी व्यापक खोजी गरिरहेका छौँ।’
यादवको शव बीएन्डबी अस्पतालमै रहेको प्रहरीले जनाएको छ।
Shares
प्रतिक्रिया