नारायणीको बाढी अझै सतर्कता तहमाथि नै, सुरक्षित रहन आग्रह

नारायणी नदीको जल सतह अझै पनि सतर्कता तहमाथि नै छ। जल तथा मौसम विज्ञान विभागका अनुसार आज बिहान ५ः५१ बजेसम्म नारायणीको पानीले सतर्कता तह पार गरेको हो। 

आइतबार राति ९ः३० बजे नै नारायणी नदीले सतर्कता तह पार गरेको थियो। विभागका अनुसार अहिले नदीको जलसतह देवघाटमा ७ दशमलव ७ मिटर र नारायणी पुल नारायणगढमा ११ दशमलव १५ मिटर छ।

देवघाटमा सात दशमलव ३ मिटर र नारायणगढमा ११ मिटरलाई सतर्कता तह मानिन्छ।

नदीमा यसअघि गत असार २३ गते पानीको सतह ७ दशमलव ४२ मिटर पुगेको थियो। चितवनमा अहिले पानी पर्न रोकिएको भए पनि अन्य क्षेत्रमा वर्षा भइरहेको जनाइएको छ। 

नदीमा पानीको सतह निरन्तर बढ्दै गएपछि चितवन र नवलपरासीको नारायणी नदी तटीय क्षेत्रका बासिन्दालाई सुरक्षित रहन आग्रह गरिएको छ।