जनकपुरको जिप अछाममा दुर्घटना, मकवानपुर र बर्दियाका व्यक्तिको मृत्यु

अछामको पञ्चदेवल बिनायक नगरपालिका-४ थापामोडस्थित मध्यपहाडी राजमार्गमा गएराति जिप दुर्घटना हुँदा दुई जनाको मृत्यु र तीन जना घाइते भएका छन्।

दार्चुलाबाट जुम्ला जाँदै गरेको सत्लोक आश्रम, जनकपुरको बाप्र ०१-०२७ च २२७७ नम्बरको जिप सडकबाट करिब २०० मिटर तल खसेको हो।

दुर्घटनामा घाइते भएका मकवानपुर, हेटौँडा उपमहानगरपालिका निवासी वर्ष ४१ का नवीन तुलाधर र बर्दिया बाँसघारी नगरपालिका-५ का ४५ वर्षीय रामप्रकाश थारूको उपचारका क्रममा प्रादेशिक अस्पताल सुर्खेतमा मृत्यु भएको अछाम प्रहरी प्रमुख प्रहरी नायब उपरीक्षक ओमप्रकाश खनालले जानकारी दिए।

उनका अनुसार घाइते सिराहा कल्याणपुर नगरपालिका-१० बस्ने २७ वर्षका सन्तकुमार साह, स्याङ्जा फेदीखोला गाउपालिका-४ बस्ने अर्जुनकुमार पौडेल र जिप चालक नेपालगञ्ज उपमहागरपालिका-५ बस्ने २८ वर्षे राज राजेन्द्र भिमराज चट्टान गुप्ताको उपचार जारी छ।

घाइतेहरूको बेलखेतबाट खटिएको प्रहरी टोलीले तत्काल उद्धार दैलेखको राकमस्थित राकम कर्णाली आधारभूत अस्पतालमा पुर्‍याएको थियो। उक्त अस्पतालमा प्राथमिक उपचारपछि उनीहरूलाई सुर्खेत रेफर गरिएको थियो। रासस