ad ad

सुदूरपश्चिम


छाङरुमा चुच्चे नक्सासहितको राष्ट्रिय स्तम्भमा फहराइयो नेपालको झण्डा

तिंकरमा पहिलो पटक कार्यपालिका बैठक
छाङरुमा चुच्चे नक्सासहितको राष्ट्रिय स्तम्भमा फहराइयो नेपालको झण्डा

गोकुल जोशी
जेठ २७, २०८० शनिबार २१:३९, कञ्चनपुर

दार्चुलाको व्याँस गाउँपालिका–१ छाङरुमा चुच्चे नक्सा अंकित राष्ट्रिय स्तम्भमा नेपाली झण्डा फहराइएको छ। 

शनिबार व्याँस गाउँपालिकाले राष्ट्रिय स्तम्भमा नेपाली झण्डा राखेको हो। व्याँस गाउँपालिकाले ०७९ असोजमा करिब १५ लाख बढीको लगानीमा छाङरुमा चुच्चे नक्सा अंकित राष्ट्रिय स्तम्भ बनाएको थियो। 

छाङरुमा १५ फिट अग्लो राष्ट्रिय स्तम्भ रहेको छ। ‘राष्ट्रिय स्तम्भमा नेपाली झण्डा राखेका छौँ, यसअघि राखिएको झण्डा च्यातिएको थियो,’ व्याँस गाउँपालिकाका अध्यक्ष मंगलसिंह धामीले भने, ‘त्यसमा यसअघि नै चुच्चे नक्सा राखेका थियौँ।’

भारतीय बाटोको प्रयोग गरेर पुगेको व्याँस गाउँपालिकाको कार्यपालिकाको टोली छाङरुमा नेपाली झण्डा फहराएको हो। भारतद्वारा अतिक्रमित नेपाली भूमि कालापानीमुनिका बस्ती छाङरु र तिंकर पुग्न नेपाली भूमिमा बाटो नहुँदा भारतको बाटो प्रयोग गर्नु पर्ने त्यहाँका बासिन्दाको बाध्यता छ।

छाङरु र तिंकरमा राज्यको उपस्थिति तथा देश–विदेशमा नेपाल चिनाउन स्तम्भ तयार पारिएको अध्यक्ष धामी बताउँछन्।

केपी शर्मा ओली नेतृत्वको सरकारको पाला भारतले अतिक्रमण गरेको नेपाली भूमि कालापानी, लिम्पियाधुरा र लिपुलेक समेटेर नेपालको नयाँ राजनीतिक तथा प्रशासनिक नक्सा जारी गरिएको थियो। जसलाई चलनचल्तिको भाषामा चुच्चे नक्सा भनेर चिनिन्छ।

कालापानी क्षेत्र समेटेर नक्सा जारी भए पनि त्यो क्षेत्र अझै नेपालले पाएको छैन। छाङरुबाट अढाई/तीन घण्टाको पैदल यात्रापछि भारतद्धारा अतिक्रमित नेपाली भूमि कालापानी पुगिन्छ। 

त्यस क्षेत्रलाई भारतले ठूलो ब्यारेक बनाएर सेना राखेको छ। चीन सीमासँग पनि जोडिएको व्याँस गाउँपालिकाका छाङरु र तिंकरमा सौका समुदायको बसोबास छ। 

तिंकरमा कार्यपालिका बैठक
कालापानीमुनिको बस्ती तिंकरमा पहिलो पटक व्याँस गाउँपालिकाले कार्यपालिका बैठक राखेको छ। 

त्यस क्षेत्रका स्थानीयसँग साक्षात्कारका साथै छाङरु तिंकरबासीको पीडा सुन्ने उद्धेश्यले कार्यपालिका बैठक तिंकरमा राखिएको गाउँपालिकाका प्रवक्ता उपेन्द्र धामी बताउँछन्।

‘कतिपय कार्यपालिका सदस्य पनि तिंकर, छाङरु पुगेको अवस्था थिएन, उहाँहरुलाई त्यहाँको अवस्थामा देखाउनका साथै स्थानीयसँग साक्षात्कारका लागि बैठक राखेका हौँ,’ उनले भने।

तिंकरमा राखिएको गाउँपालिकाको २० औँ कार्यपालिका बैठकमा कार्यपालिकाका १२ जना सदस्य सहभागी थिए।

नेपाली भूमिमा चाँडो बाटो निर्माण गरेर भारतको बाटो प्रयोग गर्नु पर्ने बाध्यता हटाउनु पर्ने स्थानीयले जनप्रतिनिधिसँग माग गरेका थिए।

कार्यपालिका बैठकले बन्द रहेको ताक्लाकोट नाका खोल्न सरकारको ध्यानाकर्षण गराउने निर्णय गरेको छ। कोरोना महामारीपछि चीनसँग जोडिएको ताक्लाकोट नाका बन्द रहेको छ।

‘अरु सबै नाका खुलेपनि ताक्लाकोट नाका अझै खुलेको छैन, हामीले केही महिनाअघि काठमाडौँ गएर नाका खोल्न माग गरेका थियौँ,’ गाउँ प्रवक्ता धामीले भने, ‘नाका खोल्न फेरि सरकारको ध्यानाकर्षण गराउने निर्णय गरेका छौँ।’

यस्तै, छाङरु र तिंकर जोड्ने नेपाली भूमिमा चाँडै बाटो निर्माणको लागि पालिकाले पहल गर्ने निर्णय गरेको छ। यसपटक सरकारले ४५ करोड मात्रै बजेट विनियोजन गरेको छ।

‘छाङरु  तिंकर जोड्न बाटो निर्माणका लागि यसपटक बजेट कम विनियोजन गरिएको छ,’ धामीले भने, ‘यसरी बाटो पुग्न वर्षौ लाग्ने देखिन्छ, निकट भविष्यमै बाटो पुर्‍याउन दबाब दिन्छौँ।’

त्यहाँका सौका समुदायले उत्पादन गर्ने स्थानीय घरेलु मदिरालाई व्यवस्थित गर्न र वैधानिकताका लागि सम्बन्धित निकायसँग पहल गर्ने कार्यपालिकाले निर्णय गरेको छ। २५ गते भारतसँग अनुमति मागेर कार्यपालिकको टोली छाङरु र तिंकरतर्फ गएको थियो।

प्रतिक्रिया

नेपाल खबर प्रा.लि
सूचना विभाग दर्ता नंः ५४९/०७४-७५

Nepal Khabar Pvt. Ltd.

Blue Star Complex
Thapathali-11, Kathmandu, Nepal
+977 01 5340505 / 5341389
Admin:[email protected]
News:[email protected]

विज्ञापनका लागि सम्पर्क


+977 9851081116
[email protected]
Copyright © 2021 Nepalkhabar. All Rights Reserved. Designed byCurves n' Colors. Powered by .