युनिकोड
खेल भावनाविपरीत काम गरेको भन्दै विराटनगर सिटी एफसीका मुख्य प्रशिक्षक यान लसहित ४ जना कारबाहीमा परेका छन्।
नेपाल सुपर लिग (एनएसएल) मा गत वैशाख २५ गते भएको ललितपुर सिटी एफसीविरुद्धको खेलमा भावनाविपरीत व्यवहार गरेको र अनुशासन तोडेको भन्दै एनएसएल आयोजक नेपाल स्पोर्ट्स एन्ड इभेन्ट म्यानेजमेन्टले मुख्य प्रशिक्षकसहित ४ जनालाई कारबाही गरेको हो।
रेफ्रीको निर्णयमा असहमत रहेको बहानामा खेल नै अवरुद्ध गरेको आरोपमा विराटनगरलाई १ लाख रुपैयाँ जरिवाना गरेको छ।
यस्तै मुख्य प्रशिक्षक यान ललाई अर्को सिजनमा प्रतिबन्ध लगाउने र ५० हजार रुपैयाँ जरिवाना गरेको आयोजकले विज्ञप्तिमार्फत जनाएको छ।
सो खेलका दौरान खेलाडीहरुलाई मैदानबाहिर बोलाएपछि खेल ७ मिनेट रोकिएको थियो। सो खेलमा स्पेनिस फरवार्ड पेड्रो मान्जीबाहेक अन्य खेलाडीले मैदान छाडेका थिए।
ललगायत अन्य अफिसियलले सबै खेलाडीलाई मैदान छाड्न लगाएका थिए।
खेलाडीलाई मैदान छाड्न उक्साएको र अनुशासन तोडेको भन्दै विराटनगरका टेक्निकल डाइरेक्टर सोनम घले, सहायक प्रशिक्षक निशान श्रेष्ठ र सहायक व्यवस्थापक मिलन गुरुङलाई आगामी सिजनका ३ खेलमा प्रतिबन्ध लगाएको छ।
त्यसबाहेक उनीहरुलाई आवश्यक देखिएमा अखिल नेपाल फुटबल संघ (एन्फा)ले थप कारबाही गर्न सक्नेछ।
दशरथ रंगशालामा भएको सो खेलमा विराटनगर ललितपुरसँग ४–० ले पराजित भएको थियो।
प्रतिक्रिया