आदिल र पृथुको शतकीय साझेदारीपछि वाग्मतीले सुदूरपश्चिमलाई दियो ३०० रनको लक्ष्य

आदिल खान र पृथृ बास्कोटाले शतकीय साझेदारी गरेपछि प्रधानमन्त्री कप एक दिवसीय राष्ट्रिय पुरुष क्रिकेट प्रतियोगितामा वाग्मती प्रदेशले सुदूरपश्चिम प्रदेशलाई ३ सय रनको विशाल लक्ष्य दिएको छ।

कीर्तिपुरस्थित त्रिवि क्रिकेट मैदानमा सुदुररपश्चिमले टस जितेर फिल्डिङ रोजेपछि ब्याटिङ गरेको बाग्मतीले निर्धारित ५० ओभरमा ९ विकेटको क्षतिमा २ सय ९९ रनको योगफल तयार पारेको हो। पीएम कपमा कुनैपनि टोलीले पाएको यो विशाल लक्ष्य हो।

सुदुरपश्चिमलाई विशाल लक्ष्य दिन खान र बास्कोटाले १ सय ९ रनको उत्कृष्ट साझेदारी गरे। ९४ बलको सामना गरेका बास्कोटाले २ छक्का र १० चौका मद्दतमा ८४ रनको महत्वपुर्ण योगदान दिए।

८६ रनको सामना गरेका खानले १० चौका मद्दतमा ६३ रनको योगदान गरे।

कप्तान ज्ञानेन्द्र मल्ल र विपिन आचार्य समान ३२, पारस खड्का २०, इसान पाण्डे १७, आकाश थापा १३ रनमा पवेलियन फर्के।

सुदुरपश्चिम प्रदेशका नाराएण जोशीले ३ तथा भोजराज भट्ट र सन्तोष भट्टले समान २ विकेट लिए। विनोद लामाको नाममा एक एक विकेट रह्यो।