युनिकोड
विनोद भण्डारीले विस्फोटक अर्धशतक प्रहार गरेपछि नेपालले मलेसियालाई दुई खेलको टि-२० शृंखला अन्तर्गत जारी दोस्रो खेलमा १ सय ७४ रनको ठूलो लक्ष्य दिएको छ।
विनोदले २५ बलमा ५१ रन जोडेपछि नेपालले निर्धारित २० ओभरमा ६ विकेट गुमाएर १ सय ७३ रन बनायो। विनोदले ३ चौका र ५ छक्का प्रहार गरेका थिए।
यो पनि: विनोदको विस्फोटक अर्धशतकसँगै नेपालद्वारा मलेसियासामु बलियो लक्ष्य प्रस्तुत
यस्तै शरद भेषावकरले ४० रन बनाए। २८ बल खेलेका शरदले ४ चौका र २ छक्का प्रहार गरे। कप्तान पारस खड्काले १९ बलमा २ चौका र २ छक्काको मद्दतमा २३ रन बनाए। उनीहरुबाहेक रोहितकुमार पौडेलले १९ तथा करण केसीले १६ रन बनाए।
यस क्रममा बनेका दुई कीर्तिमान यस्ता छन्
१) टि-२० अन्तर्राष्ट्रियमा विनोद सर्वाधिक छिटो अर्धशतक प्रहार गर्ने खेलाडी
नेपालको टि-२० अन्तर्राष्ट्रियमा विनोद भण्डारी सर्वाधिक छिटो अर्धशतक प्रहार गर्ने खेलाडी बने। उनले यसअघि कप्तान पारस खड्काको नाममा रहेको कीर्तिमान भंग गरेका हुन्।
विनोदले इनिङको अन्तिम बलमा छक्का प्रहार गर्दै २५ बलमा अर्धशतक पूरा गरेका हुन्। त्यस क्रममा उनले ३ चौका र ५ छक्का प्रहार गरे।
यसअघि पारस खड्काले शनिबारमात्रै मलेसियाविरुद्धको पहिलो टि-२० अन्तर्राष्ट्रियमा ३२ बलमा अर्धशतक प्रहार गर्दै सो कीर्तिमान राखेका थिए।
२) टि-२० अन्तर्राष्ट्रियमा सर्वाधिक उच्च स्कोर
नेपाली टोलीले टि-२० अन्तर्राष्ट्रियमा सर्वाधिक ठूलो स्कोर गर्ने कीर्तिमान पनि यस खेलमा बनायो। यस खेलमा नेपालले २० ओभरमा ६ विकेट गुमाएर १ सय ७३ रन बनाएको हो। यसअघि सन् २०१४ को टी ट्वान्टी विश्वकपमा हङकङविरुद्ध नेपालले १ सय ४९ रनको स्को बनाएको थियो। त्यसै कीर्तिमानलाई यस खेलमा नेपालले भंग गरेको हो।
मलेसियाको क्वालालाम्पुरस्थित किनारारा ओभल क्रिकेट मैदानमा जारी दोस्रो खेलमा शृंखला क्लिन स्विप गर्ने लक्ष्यसहित नेपाल मैदानमा उत्रिएको हो।
नेपालले शनिबार भएको पहिलो खेलमा मलेसियालाई ७ विकेटले पराजित गरेको थियो। यस खेलमा जित हात पारेमा पहिलो पटक इतिहासमा नेपालले टि-२० शृंखलामा क्लिन स्विप गर्नेछ।
अघिल्लो खेल भन्दा यस खेलमा नेपालले दुई परिवर्तन गरेको छ। ओपनर प्रदीप ऐरीको स्थानमा पवन सरार्फ र स्पिनर बसन्त रेग्मीको स्थानमा तीव्रगतिका बलर अभिनास बोहराले मौका पाएका छन्।
यो पनि: त्यसपछि सागर स्पिनर बनेर चम्किए
सन् २०२० मा अष्ट्रेलियामा हुने आइसीसी टि–२० विश्वकप अन्तर्गत एसिया क्षेत्र छनोटको अन्तिम तयारी स्वरुप नेपालले शनिबार र आइतबार(असार २८ र २९) मलेसियाविरुद्ध दुईवटा खेलको अन्तर्राष्ट्रिय टि–२० शृंखला खेल्दैछन्।
आइसीसी टि–२० वरियतामा नेपाल ११औं स्थानमा छ भने मलेसिया ३५औं स्थानमा छ।
यो पनि: नेपाल फेरि विश्वकप खेल्न कस्सियो
मलेसियामा १० दिन बिताएर साउन ३ गते नेपाल विश्वकपको एसिया छनौट खेल्न आयोजना स्थल सिंगापुर प्रस्थान गर्नेछ।
एसिया छनौटमा नेपालसहित आयोजक सिंगापुर, कुवेत, कतार र मलेसिया गरी ६ टोलीले सहभागिता जनाउँदैछन्।
एसिया छनौटमा नेपालको खेल तालिका
साउन ७– नेपाल भर्सेस कतार
साउन ८– नेपाल भर्सेस मलेसिया
साउन ११– नेपाल भर्सेस कुवेत
साउन १२– नेपाल भर्सेस सिंगापुर
टि–२० प्रतियोगितामा राउण्ड रोबिन आधारमा सबै टोलीले एकअर्कासँग खेलिसकेपछि अंकतालिकाको शीर्षमा रहने एउटा टोली ग्लोबल छनौटमा पुग्ने छ।
असोजमा यूएईमा हुने ग्लोबलमा नेपालसहित १४ राष्ट्रले सहभागिता जनाउँनेछन्। त्यसमध्ये ६ राष्ट्रले विश्वकप खेल्न पाउँनेछन्।
ग्लोबल छनौट खेल्ने स्कटल्याण्ड, जिम्बाबे, नेदरल्याण्ड्स, हङकङ, ओमान, आयरल्याण्ड्स, यूएई, पपुवा न्यूगिनी, केन्या, नामिबिया र जर्सी गरी ११ टोलीको टुंगो लागिसकेको छ। त्यसमा नेपाल खेल्ने एसिया छनौटबाट एक टोली र अमेरिका छनौटबाट दुई टोली थपिनेछन्।
नेपाली टोली
कप्तान पारस खड्का, अभिनास बोहरा, बसन्त रेग्मी, विनोद भण्डारी, दिपेन्द्रसिंह ऐरी, ज्ञानेन्द्र मल्ल, करण केसी, ललितनारायण राजवंशी, प्रदीप ऐरी, पवन सर्राफ, रोहितकुमार पौडेल, सन्दीप लामिछाने, शरद भेषवाकर, सोमपाल कामी।
प्रतिक्रिया