युनिकोड
सिद्धार्थ बैंक नेपाल प्रिमियर लिग (एनपीएल) मा आज बुधबार अपराजित विराटनगर किंग्स र चितवन राइनोज भिड्दैछन्।
कीर्तिपुरस्थित त्रिवि क्रिकेट मैदानमा हुने खेल अपराह्न ४ बजे सुरु हुनेछ। विराटनगर सन्दीप लामिछाने र चितवन कुशल मल्लको कप्तानीमा मैदान उत्रनेछन्।
लिग चरणमा अपराजित रहेको विराटनगर चितवनलाई पराजित गर्दै प्लेअफ खेल्ने सम्भावनालाई थप बलियो बनाउन चाहान्छ।
लिगमा ३ खेल खेलेको विराटनगर ६ अंकमा तालिकाको दोस्रो स्थानमा छ। विराटनगरले पहिलो खेलमा पोखरा एभेन्जर्सलाई ५३ रनले तथा काठमाडौ गोर्खाजलाई ५ विकेटले हराएको थियो। तेस्रो खेलमा साविक विजेता जनकपुर बोल्ट्सलाई ९ रनले हराउँदै अपराजित यात्रालाई कायम राखेको थियो।
यता एनपीएलमा तेस्रो खेल खेल्न लागेको चितवन पनि लयमा रहेको विराटनगरलाई पराजित गर्दै अंक तालिका सुधार गर्ने योजानमा हुनेछ। चितवनले २ खेल मध्य एक खेलमा जित र एक खेलमा हार भागेको छ। २ खेलबाट २ अंक बनाएको चितवन पाचौँ स्थानमा छ।
चितवनले पहिलो खेलमा कर्णाली याक्सलाई ४ विकेटले हराएको थियो। दोस्रो खेलमा चितवन लुम्बिनी लायन्ससँग ६ विकेटले पराजित भएको थियो।
प्रतिक्रिया