एसीसी इस्टर्न रिजन टी-ट्वान्टी क्रिकेट प्रतियोगिताअन्तर्गत शुक्रबार हुने भनिएको नेपाल र सिंगापुरबीचको खेल रद्द गरिएको छ।
थाइल्यान्डको बैंककस्थित टेर्डथाई क्रिकेट मैदानमा स्थानीय समयअनुसार बिहान १०:३० बजे हुने भनिएको खेल वर्षाले खेल मैदान बिगारेका कारण रद्द गरिएको हो।
वर्षाको पानीले खेल मैदान गिलो भएपछि सुरुमा बिहान सवा ८ बजेका लागि तोकिएको खेल १०:३० बजेका लागि सारिएको थियो।
तर गिलो मैदानका कारण टस समेत हुन नसक्दा खेल रद्द भएको एसियन क्रिकेट काउन्सिल एसीसीले जनाएको छ।
खेल रद्द भएसँगै दुवै टोलीले १-१ अंक बाँडेका छन्। योसँगै नेपालको इस्टर्न रिजनमा यात्रा पनि सकिएको छ।
४ खेल मध्ये १ मा जित, २ मा हार र १ खेल रद्द भएपछि नेपा ३ अंकमा चौथो स्थानमा रहँदै थाइल्याण्ड यात्रा सकाएको छ।
नेपाल मलेसियासँग २२, हङकङसँग ४३ रनले पराजित हुँदा थाइल्यान्डलाई ९ विकेटले हराएको थियो।
सिंगापुरले मलेसियालाई १ सय २८ रन, थाईल्यान्डलाई ४३ रन र हङकङलाई १६ रनले पराजित गरेको थियो।
योसँगै सिंगापुरले इस्टर्न रिजनको उपाधि जितेको छ। सिंगापुर ४ खेलमा ३ मा जित र १ मा रद्ध सहित ७ अंकका साथ च्याम्पियन बनेको हो।
आजको दोस्रो खेलमा हङकङ र मलेसिया भिड्दै छन्।
दुवैको ३ खेलमा समान २ मा जित र १ मा हार सहित ४ अंक छ। विजेता टोली दोस्रो स्थानमा रहँदै आगमी अगस्टमा मलेसियामा हुने एसिया कप छनोटमा स्थान बनाउनेछ।
Shares
प्रतिक्रिया