युनिकोड
पोखरामा जारी केपी ओली कप टी–२० क्रिकेट प्रतियोगितामा नेपाल पुलिस क्लबसविरुद्ध जित हात पारेपनि सुदूरपश्चिम प्रदेश सेमिफाइन पुग्नबाट बञ्चित भएको छ।
मंगलबार पोखरामा भएको खेलमा पुलिस क्लबलाई ४ विकेटले पराजित गरेपनि सुदूरपश्चिम नेट रनरेटमा पछि पर्दै सेमिफाइनल पुग्न नसकेको हो।
समूह सी बाट मधेश प्रदेश सेमिफाइलमा पुगेको छ।
समूह सी का मधेश प्रदेश, पुलिस क्लब र सुदूरपश्चिम तीनै टोलीको समान २ अंक छ। समान २ अंक भएपनि नेट रनरेटमा मधेश प्रदेश अघि रहँदै सेमिफाइनलमा पुगेको हो।
मधेसले समूह चरणको खेलमा सुदूरपश्चिमलाई ८ विकेटले पराजित गरेको थियो। पुलिस क्लबले भने मधेशलाई ५७ रनले हराएको थियो।
योसँगै सेमिफाइनलमा पुग्ने तीन टोलीको टुङ्गो लागिसकेको छ। समूह ए बाट बागमती प्रदेश, समूह बी बाट एपीएफ र सी बाट मधेशले अन्तिम चारमा स्थान बनाइसकेका छन्।
अब समूह डी मा रहेका आर्मी, आयोजक निलो र प्रदेश १ मध्य १ टोलीले सेमिफाइनलमा स्थान पक्का गर्नेछन्।
पुलिस क्लबले दिएको १ सय ५९ रनको लक्ष्य सुुदूरले १८.४ ओभरमा ६ विकेटको क्षतिमा भेट्टायो।
सुदूरका लागि किरण थगुन्नाले अर्धशतक प्रहार गरे। ३४ बलमा ४ चौका र २ छक्का हानेका किरण ५१ रनमा नटआउट रहे।
नरेन साउदले ३९ रन थपे। कप्तान राजु रिजालले १९ र नारायण जोशीले १७ रन थपे। वसन्त कार्कीले १५ रन बनाए।
पुलिस क्लबका रसिद खानले तीन विकेट दिए। सुनिल धमाला र सागर ढकालले समान एक विकेट लिए।
त्यसअघि पोखरा रगंशालाभित्र रहेको क्रिकेट मैदानमा टस जितेर ब्याटिङ गरेको नेपाल पुलिस क्लबले निर्धारित २० ओभरमा ४ विकेटको क्षतिमा १ सय ५८ रनको योगफल तयार पारेको हो।
पुलिस क्लबका लागि कुशल भुर्तेलले ६७ रनमा क्याच आउट भयो। ५१ बलमा ५ चौका र ५ छक्का प्रहार गरे। सुनिल धमालाले ४२ रन थपे। अर्जुन साउदले २० रन बनाए।
सुदूरका लागि विकास आग्रीले २ तथा भोजराज भट्ट र वसन्त कार्कीले समान एक विकेट झारे।
प्रतिक्रिया