मोरङमा एक युवतीको हत्या भएको छ। बुधबार बिहान मोरङको रंगेली नगरपालिका ३ स्थित तिलुवा चोकको नहरमा २४ वर्षीया अनिता यादवको शव फेला परेको हो।
उनको हत्या देवर नाता पर्ने १९ वर्षीय बिनोद यादवले गरेको प्रहरीको आशंका छ।
अनिता र बिनोदबिच मंगलबार साँझ विवाद भएको पाइएको मोरङका डीएसपी मानबहादुर राईले बताए।
मंगलबार बेलुका ८ बजेतिर बिनोदले धारिलो हतियार दाउले घाँटीमा प्रहार गरी घटनास्थलमा नै हत्या गरेको खुल्न आएको डीएसपी राईले बताए।
बिनोदलाई प्रहरीले पक्राउ गरेको छ। घटनामा प्रयोग भएको दाउ तथा अभियुक्तले लगाएको कपडा समेत प्रहरीले बरामद गरेको जनाएको छ।
उनलाई मुलुकी अपराध संहिता २०७४ को ज्यान सम्बन्धी कसूरमा ईलाका प्रहरी कार्यालय रंगेलीले थप अनुसन्धान सुरु गरेको छ।
प्रतिक्रिया