युनिकोड
वीरगंज महानगरपालिका–२२ जगरनाथपुर चोकमा ड्युटीमा खटिएको प्रहरीमाथि ढुंगा प्रहार गरेको अभियोगमा प्रहरीले तीन जनालाई पक्राउ गरेको छ।
पक्राउ पर्नेमा सोही ठाउँ बस्ने ३५ वर्षीय सुरेन्द्र साह, ३५ वर्षीय राजेन्द्र यादव र ३५ वर्षीय राजन यादव रहेका छन्।
उक्त चोकमा सोही ठाउँ बस्ने ४० वर्षीय मोहम्मद अकवर र मोहम्मद उसमानलाई मोटरसाइकलले ठक्कर दिएको बिषयलाई लिएर सोही ठाउँ बस्ने पर्मा यादव र उमर यादवले कुटपिट गरेको भन्ने खबर प्राप्त हुनासाथ वडा प्रहरी कार्यालय श्रीपुरबाट खटिएको प्रहरीले पर्मा र उमरलाई नियन्त्रणमा लिएको थियो।
नियन्त्रणमा लिएका दुवै जनालाई स्थानीयले प्रहरीबाट खोसी भगाएको भन्ने खबर प्राप्त हुनासाथ प्रहरी चौकी परवानीपुर र प्रहरी चौकी गण्डक समेतबाट खटिएको प्रहरीले घटनाबारे जानकारी लिने क्रममा स्थानीयले प्रहरीमाथि नै ढुंगा प्रहार गर्दा १ जना प्रहरी जवान सामान्य घाइते भएका छन्।
उनलाई उपचारको लागि नारायणी अस्पताल वीरगंजमा पठाइएको छ। ढुंगा प्रहारबाट प्रहरी चौकी परवानीपुरको ना.१ झ ५६९ नम्बरको गाडीको पछाडीको शिसा फुटेर क्षति भएको छ।
कुटपिटबाट घाइते भएका मोहम्मद उसमानको सोही अस्पतालमा उपचार भइरहेको छ। स्थितिलाई नियन्त्रणमा लिएर यस सम्बन्धमा प्रहरीले थप अनुसन्धान गरिरहेको छ।
प्रतिक्रिया