युनिकोड
दोलखामा बोलेरो गाडी दुर्घटना हुँदा चार जनाको मृत्यु भएको छ। १७ यात्रु घाइते भएका छन्।
दोलखा जिल्ला प्रहरी कार्यालयका प्रवक्ता प्रहरी निरीक्षक अञ्जन कोइरालाका अनुसार ३ जनाको घटनास्थलमै र एक जनाको उपचारका क्रममा मृत्यु भएको हो।
‘राति ११ बजे दोलखाको बिगु गाउँपालिका-४ लादुकमा बोलेरो दुर्घटना भएको हो,’ मंगलबार बिहान प्रहरी निरीक्षक कोइरालाले नेपालखबरसँग भने, ‘दुर्घटनामा १७ जना घाइते भएका छन्।’
उनका अनुसार घाइतेमध्ये ५ जनाको अवस्था गम्भीर छ। चरिकोट अस्पतालमा ३ जनाको उपचार गरिएको उनले बताए। अन्यलाई उपचारका लागि काठमाडौ पठाइएको छ।
प्रहरी निरीक्षक कोइरालाका अनुसार दुर्घटनामा २४ वर्षीया चण्डिका थापा, ५२ वर्षीया राधा खड्का, ४५ वर्षीया अजिता खत्री र ३५ वर्षीय विनोद केसीको मृत्यु भएको हो। मृतक सबै बिगु गाउँपालिका वडा नम्बर ३ का हुन्।
‘गाडीमा २२ जना चढेका रहेछन्,’ उनले भने, ‘तीमध्ये १० महिने बालक भने सामान्य मात्र घाइते भएकाले अभिभावकले घर लगेका छन्।’
प्रदेश ३ –०१ –०२३ च ७५८० नम्बरको बोलेरो दुर्घटना भएको हो।
प्रतिक्रिया