बोलेरो पल्टिँदा चालकको मृत्यु, अन्य तीन जना घाइते

बैतडीको सूर्नयामा बोलेरो दुर्घटना हुँदा एक जनाको मृत्यु भएको छ। दुर्घटनामा अन्य तीन जना घाइते भएका छन्। घाइतेमध्ये दुई जनाको अवथा गम्भीर रहेको प्रहरीले जनाएको छ।

धनगढीबाट बझाङ जाँदै गरेको से १ ज ८४३ नम्बरको बोलेरो बिहीबार बिहान सुर्नया गाउँपालिका–८ आलगैरामा दुर्घटनामा परेको हो। दुर्घटनामा बझाङकै बुंगल नगरपालिका–११ का २७ वर्षीय धनबहादुर बोहराको मृत्यु भएको छ। उनी बोलेको चालक हुन्। उनको घटनास्थलमै मृत्यु भएको प्रहरीले जनाएको छ।

दुर्घटनामा घाइते भएका बैतडीको पुर्चौडी नगरपालिका ४ भटनाका ४० वर्षीय गंगादत्त भट्ट र ३५ वर्षीय जनक भट्टको अवस्था गम्भीर छ। उनीहरूलाई उपचार गर्न डडेल्धुरा लगिएको छ।

तीव्र गति र हुस्सुको कारण बोलेरो दुर्घटना भएको अनुमान प्रहरीले गरेको छ।