आधा शरीर गाडेको अवस्थामा नवजात शिशु जिवितै फेला

सप्तरीको बोदे बरसाईन नगरपालिका-५ जाँजरस्थित खडक खोलामा आधा शरीर माटोमा गाडेको अवस्थामा एक नवजात शिशु जिवितै फेला परेका छन्।

घाँटीदेखि पेटसम्मको भाग बालुवामा गाडिएको अवस्थामा शिशु फेला परेको प्रहरीले जानकारी दिएको छ। स्थानीयले खबर गरेपछि पुगेको प्रहरीले शिशुको उद्धार गरी उपचारका लागि राजविराजस्थित गजेन्द्रनारायण सिंह अस्पताल भर्ना गरेको थियो।

सामान्य उपचारपछि राजविराज अस्पतालले शिशुलाई धरानस्थित विपी कोइराला स्वास्थ्य विज्ञान प्रतिष्ठान पठाइएको इलाका प्रहरी कार्यालयका प्रहरी नायब निरीक्षक अयोधिशरण यादवले जानकारी दिए।

शिशुको पहिचान खुलेको छैन। शिशु कसले फालेको भनेर अनुसन्धान भइरहेको यादवले बताए। अवैद्य सम्बन्धपछि जन्मिएको शिशु फालिएको हुनसक्ने आशंका स्थानीले गरेका छन्।