म्याक्रोंको मुस्लिमबारे विवादस्पद अभिव्यक्तिसँगै फ्रान्सको चर्चमा चक्कु आक्रमण, तीनको मृत्यु

यस आक्रमणमा ३ जनाको मृत्यु हुनुको साथै कयौं घाइते भएको फ्रान्सका संचारमाध्यमलाई उदृत गर्दै टाइम्स अफ इन्डिजाले जनाएको छ।

निस शहरका मेयर क्रिस्टियन इस्टरोसीका अनुसार नोट्रे डेम चर्च नजिकै आक्रमण भएको छ। यस घटनालाई प्रहरीले आतंकवादी आक्रमण भनेका छन्। प्रहरीले आक्रमणकारीलाई नियन्त्रणमा लिइसकेको छ।

यसै महिनाको सुरुवातमा मुस्लिम अतिवादीले फ्रान्सेली शिक्षकको शिर छेदन गरेर हत्या गरेको केही समयमै चर्चमा चक्कु आक्रमणको घटना भएको हो।

शिक्षक स्यामुअल पाटीले मुस्लिम धर्मगुरुको अपमानजनक कार्टुन देखाएर आफ्ना विद्यार्थीलाई अभिव्यक्ति स्वतन्त्रताको पाठ पढाएका थिए।

उक्त घटनासँगै फ्रान्सका राष्ट्रपति इम्यानुअल म्याक्रोंले मुस्लिम धर्म आज विश्वभर संकटमा रहेको बताउँदै यस धर्ममा कट्टरपन्थी र प्रलोभनद्वाराग्रस्त बनेका मानिसहरु रहेको र उनीहरुले अरुको विनाशको सोच राख्ने आरोप लगाएका थिए।

म्याक्रोंले शिक्षकको हत्यालाई इस्लामी आतंकवादीको आक्रमणको संज्ञा दिएका थिए। म्याक्रोंले विवादित बयान दिएयता मुस्लिम राष्ट्रहरु उनीसँग रुष्ट बनेका छन्।