काठमाडौंका ६ सहित कोरोनाबाट देशभर थप १८ जनाको मृत्यु

कोरोना संक्रमणबाट शुक्रबार काठमाडौंमा ६ सहित देशभर थप १८ जनाको मृत्यु भएको छ।

काठमाडौंका ६, भक्तपुरका ५, चितवनका ३, सुनसरीका २, मोरङ र दाङका १-१ जना संक्रमितको मृत्यु भएको हो। यो सँगै नेपालमा कोरोना संक्रमणबाट मृत्यु हुनेको संख्या आठ सय २९ पुगेको छ।

पछिल्लो २४ घण्टामा थप ४ हजार ४ सय ९९ जनामा कोरोना संक्रमण पुष्टि भएको छ। स्वास्थ्य तथा जनसंख्या मन्त्रालयका अनुसार उपत्यकाका तीन जिल्लाका २ हजार ७२० सहित देशभरमा थप ४ हजार ४९९ जनामा कोरोना पुष्टि भएको हो।

अहिलेसम्म नेपालमा एक लाख ५३ हजार आठ जनामा संक्रमण पुष्टि भएको छ भने एक लाख पाँच हजार चार सय ८८ जना संक्रमित निको भइसकेका छन्। हाल नेपालमा सक्रिय संक्रमितको ४६ हजार ६ सय ९१ छ।