कोरोनाबाट मृत्यु भएका व्यक्तिको शव सम्मानकासाथ व्यवस्थापन

धनुषामा कोरोना संक्रमणबाट आइतबार मृत्यु भएका ३८ वर्षीय एक पुरुषको शवलाई नेपाली सेनाले व्यवस्थपन गरेको छ। धनुषाको सहिद नगरपालिका ८ डुमरियाका ३८ वर्षीय पुरुषको शवलाई सोमबार नेपाली सेनाले व्यवस्थापन गरेको हो।

संक्रमित पुरुषको शवलाई श्रीनाथ गणबाट सह सेनानी बिधुत कुमार बस्नेतको नेतृत्वमा खटेको टोलीले धनुषाको मिथिला बिहारी नगरपालिका २ स्थित परसुराम तलाउ नजिकै ससम्मान अन्त्येष्टि गरेको जनाएको छ।

रुघाखोकी, ज्वरो र श्वासप्रश्वासमा समस्या आएपछि गएको शनिबार ती पुरुषलाई उपचारको लागि प्रादेशिक अस्पताल अन्तर्गत निर्माण गरिएको कोभिड २ लेभेल अस्पतालको आइसोलेशनमा भर्ना गरिएको थियो। अवस्था गम्भीर हुँदा भेन्टिलेटरको अभावमा शनिबार थप उपचारको लागि विपी कोइराला विज्ञान प्रतिष्ठान धरान पठाउँदै गर्दा बाटोमै उनको मृत्यु भएको थियो।

कोरोना संक्रमणबाट मृत्युभएपछि प्रादेशिक अस्पतालमा उनलाई उपचार गरिएको आकास्मिक वार्ड २४ घण्टा र आइसियू वार्ड ७ दिनको लागि सिल गरिएको छ।

यस्तै संक्रमितको बसोबास स्थल सहिदनगर नगरपालिका ८ स्थित डुमरियासहित नाथपट्टीलाई सोमबार सिल गरिएको सहिदनगर नगरपालिकाले जनाएको छ। मृतकका परिवारका १३ जनालाई क्वारेन्टाइनमा समेत राखिएको छ भने कन्ट्यक्ट ट्रेसिंगको काम भइरहेको छ।

ती व्यक्ति डुमरिया बजारमा किराना र हार्डवेयरको पसल सञ्चालन गर्दै आएका थिए।