काठमाडौंमा शौच गरिरहेका बेला पहिरो खस्दा युवकको मृत्यु

काठमाडौंको कागेश्वरी मनोहरा नगरपालिका वडा नम्बर १, गागलफेदीको सतीघट्टा भन्ने स्थानमा पहिरोले पुर्दा एक युवकको मृत्यु भएको छ।

बौद्धस्थित महानगरीय प्रहरी वृत्तका प्रमुख डीएसपी नवीन कार्कीले सोमबार बिहान दिएको जानकारीअनुसार आइतबार साँझ पहिरोले पुर्दा सतीघट्टा नै घर भएका २२ वर्षीय नवराज गुरुङको मृत्यु भएको हो।

‘उनी साथीहरूसँग घुम्न निस्किएका रहेछन्,’ डीएसपी कार्कीले नेपालखबरसँग भने, ‘त्यस क्रममा उनी शौच गर्न गएका रहेछन्, त्यही बेला माथिबाट पहिरो खस्दा उनी पुरिएछन्।’

उनका अनुसार घटना आइतबार साँझ साढे ६ बजेतिरको हो। ‘पहिरो पन्छाएर शव निकाल्नुपर्‍याे,’ उनले भने, ‘अहिले शव टिचिङमा अस्पतालमा छ।’

डीएसपी कार्कीका अनुसार खोला छेउको त्यो ठाउँमा यसअघि भने कहिले पहिरो गएको थिएन।