निको नहुँदै सेती प्रादेशिक अस्पतालमा उपचाररत ६ जना कोरोना संक्रमित डिस्चार्ज

सेती प्रादेशिक अस्पतालले कोरोना संक्रमण मुक्त भएको(नेगेटिभ) नतिजा नआईकनै आइसोलेसनमा भर्ना भएका ६ जना कोरोना संक्रमितलाई डिस्चार्ज गरेको छ।

अस्पतालले स्वास्थ्य मन्त्रालयको नयाँ निर्देशिका बमोजिम १४ दिन कटेका र लक्षण नदेखिएका संक्रमितहरुलाई डिस्चार्ज गरेको हो। अस्पतालले नयाँ निर्देशिका बमोजिम उनीहरुको नेगेटिभ रिजल्ट कुर्नु नपर्ने देखिएकाले डिस्चार्ज गरिएको जनाएको छ।

स्वास्थ्य तथा जनसंख्या मन्त्रालयले यही जेठ २० गते जारी गरेको कोभिड १९ केश आइसोलेसन व्यवस्थापन सम्बन्धि निर्देशिकामा लक्षण तथा चिन्ह नदेखिएका केशको हकमा आइसोलेसन बसेको १४ दिनपछि छोड्न मिल्ने उल्लेख छ।

अस्पतालका प्रवक्ता डा. जगदिश जोशीले स्वास्थ्य मन्त्रालयको सोही निर्देशिकालाई टेक्दै १४ दिन अस्पतालको आइसोलेसनमा बसिसकेका तर कुनै लक्षण नदेखिएका ६ जनालाई डिस्चार्ज गरिएको जानकारी दिए।

‘संक्रमितहरु बढ्दै गएपछि स्वास्थ्य मन्त्रालयले जारी गरेको निर्देशिकाले नै १४ दिन कटाएर लक्षण नदेखिएकालाई पठाउन भनेको छ। त्यही अनुसार डिस्चार्ज गरिएको हो,’ प्रवक्ता जोशीले नेपालखबरसँग भने।

यसअघि दुई पटक कोरोना परीक्षण रिपोर्ट नेगेटिभ आएपछि मात्रै डिस्चार्ज गर्ने गरिएको थियो। त्यसो गर्दा लामो समय संक्रमितहरुले आइसोलेसनमा बिताउने गरेका थिए। केसहरुको संख्या बढेसँगै स्वास्थ्य मन्त्रालयले लक्षण नदेखिएका विरामीहरुलाई घरमै आइसोलेसन राख्ने निती अनुरुप नयाँ निर्देशिका जारी गरेको हो।

अस्पतालले शुक्रबार अछामको मेल्लेख गाउँपालिकाका ३२ बर्षीय पुरुष र ११ बर्षीय बालिका, बैतडीको शिवनाथ गाउँपालिका वडा नम्वर १ का २० बर्षीय र २७ बर्षीय पुरुष तथा शिवनाथ गाउँपालिका वडा नम्वर २ का २० र २२ बर्षीय पुरुषलाई १४ दिन कटेको र लक्षण पनि नदेखिएको भन्दै डिस्चार्ज गरेको हो।
भारतबाट आएका उनीहरु गत जेठ ८ गतेबाट अस्पतालको आइसोलेसनमा उपचाररत थिए। २४ वटामात्रै आइसोलेसन बेड रहेको सेती अस्पतालमा २६ जना संक्रमितको उपचार हुँदै थियो। आइसोलेसन सैय्या अभावमा यसैहप्ता कैलालीको गौरिगंगाका ५ संक्रमितलाई अस्पतालले फिर्ता पठाएको थियो।

केस हरु पनि बढ्दै गएको, आइसोलेसन तथा जनशक्तिको अभावका बेला १४ दिन कटेका तथा लक्षण देखिएका संक्रमितलाई घर पठाउने निर्णयलाई डा. जोशीले समर्थन गरे।

‘१४ दिन पुगेपछि पोजिटिभ केसले अरुलाई संक्रमण गराउन सक्ने सम्भावना एकदमै न्यून हुन्छ,’ डा. जोशीले भने, ‘केसहरु बढ्दै गएपछि लक्षण नदेखिएका व्यक्तिलाई घर पठाउनु ठिकै हो। उनीहरुलाई दुई हप्ताजति होम क्वारेन्टिन तथा आइसोसनमा बस्न, अरुसँग घुलमिल नहुन, पौष्टिक खानेकुरा खान र चिकित्सकको नियमित सम्पर्कमा रहन भनि सम्झाई बुझाई पठाइएको छ।’

स्वास्थ्य मन्त्रालयले जारी गरेको निर्देशिकाको घरमै आइसोलेसनमा बस्दा पालना गर्नुपर्ने कुराहरु उल्लेख छन। जसमा हावा खेल्ने तथा प्रर्याप्त प्रकाश आउने छुट्टै कोठाको व्यवस्था हुनुपर्ने, उपचार अवधिभर बाहिर ननिस्कने र आवश्यक सामाग्री परिवारका सदस्यहरुमार्फत मगाउने, पर्याप्त मात्रामा पानी, झोलिलो र पोसिलो खानेकुरा खाने, प्रयोग गरेको भाडाहरु सुरक्षित रुपमा सफा गर्ने र राम्रो सुकेपछिमात्रै प्रयोग गर्ने उल्लेख छ।

यस्तै स्नानघर, शौचालयको छुट्टै व्यवस्था मिलाउने, सामुहिक रुपमा प्रयोग गर्नुपर्ने अवस्थामा राम्रोसँग सरसफाई गर्ने, व्यक्तिगत सामाग्रीहरु अरुलाई प्रयोग गर्न नदिने, हातधुने साबुन र पञ्जाको पर्याप्त व्यवस्था गर्नुपर्ने, दिनमा कम्तीमा ३ पटक ज्वरो जाँच गरी रेकर्ड राख्ने, हरेक दिन दुईपटक आफ्नो स्वास्थ्य अवस्थाबारे सम्बन्धित स्वास्थ्यकर्मीलाई फोन तथा एसएमएसबाट जानकारी गराउने आदि उल्लेख छ।

सुदूरपश्चिममा कोरोना संक्रमितको संख्या ९२ छ। तीमध्ये ७ जना निकाे भएर यसअघि नै घर फर्किसकेको छन्। काेराेनाका कारण सुदूरपश्चिममा अहिलेसम्म एक जनाको मृत्यु भएको छ।

याे पनि: सुदूरपश्चिममा कोरोना परीक्षणका लागि नमूना संकलन कार्य स्थगित