युनिकोड
युरो किड्स एन्ड युरो स्कुल श्रीजनानगर, भक्तपुरद्वारा आयोजित वार्षिक खेलकुद महोत्सव ‘युरो स्पोर्ट्स टाइम २०८२’ सम्पन्न भएको छ।
सोमबारदेखि शुक्रबारसम्म सञ्चालन भएको उक्त कार्यक्रमले खेलमार्फत सिकाइ, स्वस्थ जीवनशैली र समग्र व्यक्तित्व विकासलाई प्रवर्द्धन गर्ने विद्यालयको शिक्षण दर्शनलाई प्रभावकारी रूपमा उजागर गरेको छ।
युरो किड्स एन्ड युरो स्कुलका संस्थापक अध्यक्ष नवराज काफ्लेको सभापतित्वमा सम्पन्न कार्यक्रममा नेपाल प्रहरी अस्पतालका हाडजोर्नी विभाग प्रमुख डीआईजी. डा गोपेश कुमार ठाकुर प्रमुख अतिथि थिए।
कार्यक्रमको सञ्चालन सारा काफ्लेले गरेकी थिइन् भने सूर्यविनायक नगरपालिका खेलकुद विकास समितिका संयोजक दीपक थापा विशेष अतिथिका रूपमा सहभागी थिए।
विद्यालयकी संस्थापक तथा प्रधानाध्यापिका सम्झना गिरीले स्वागत गर्दै बालबालिकाको सर्वाङ्गीण विकासका लागि खेलकुद, कला, अनुशासन र सिर्जनशीलता समान रूपमा आवश्यक रहेको बताइन्। उनले विद्यालयले एकेडेमिक उत्कृष्टतासँगै जीवनोपयोगी सीप विकासमा विशेष जोड दिँदै आएको उल्लेख गरिन्।
उनले भनिन्, ‘शिक्षा केवल पाठ्यपुस्तकमा सीमित हुनु हुँदैन। खेलकुदले बालबालिकामा आत्मविश्वास, नेतृत्व, सहकार्य र सकारात्मक सोच विकास गराउँछ।’
त्यस्तै, डीआईजी डा. ठाकुरले खेलकुद र मानसिक स्वास्थ्यबीचको सम्बन्धबारे प्रकाश पार्दै भने, ‘आजको डिजिटल युगमा यस्ता खेलकुद कार्यक्रमहरूले बालबालिकालाई शारीरिक रूपमा सक्रिय, मानसिक रूपमा सशक्त र सामाजिक रूपमा जिम्मेवार बनाउँछन्।’
उनले विद्यार्थीहरूको अनुशासन, प्रस्तुतिकरण र आत्मविश्वास देखेर आफू अत्यन्तै प्रभावित भएको उल्लेख गरे। कार्यक्रममा विद्यार्थीहरूले नृत्य, योग, जिम्नास्टिक, कराँते प्रदर्शन, समूहगत खेलकुद प्रतियोगिता तथा रचनात्मक गतिविधिहरू प्रस्तुत गरेका थिए।
कार्यक्रमले समावेशी सहभागितालाई प्राथमिकता दिँदै सबै विद्यार्थीलाई आफ्नो क्षमता प्रदर्शन गर्ने अवसर प्रदान गरेको थियो। साना कक्षादेखि ठूला कक्षासम्मका विद्यार्थीहरूको उत्साहपूर्ण सहभागिताले अभिभावकहरूलाई समेत भावुक बनाएको थियो।
खेलकुद प्रतियोगितामा उत्कृष्ट प्रदर्शन गर्ने विद्यार्थीहरूलाई प्रमाणपत्र, मेडल तथा ट्रफी प्रदान गरिएको थियो। पुरस्कार वितरणसँगै विद्यार्थीहरूमा स्वस्थ प्रतिस्पर्धा भावना र खेल भावना विकास भएको स्पष्ट देखिन्थ्यो।
कार्यक्रमका सभापति तथा विद्यालयका संस्थापक अध्यक्ष नवराज काफ्लेले विद्यालयको दीर्घकालीन शैक्षिक दृष्टिकोण स्पष्ट पार्दै भने, ‘युरो स्कुल केवल परीक्षा उत्तीर्ण गराउने संस्था होइन, यो जिम्मेवार, आत्मविश्वासी र नैतिक नागरिक उत्पादन गर्ने शैक्षिक यात्रा हो। बालबालिकाको मुस्कान र आत्मविश्वास नै हाम्रो सफलताको वास्तविक मापन हो।’
उनले शिक्षक, कर्मचारी, अभिभावक तथा सम्पूर्ण विद्यालय परिवारप्रति हार्दिक आभार व्यक्त गरे। कार्यक्रमको अन्त्यमा ‘युरो स्पोर्ट्स टाइम’ लेखिएको ब्यानरसहित आकाशमा रङ्गीन बेलुन उडाएर औपचारिक समापन गरिएको थियो।
सो क्षणले उत्सव, उपलब्धि र सामूहिक खुसीको सन्देश बोकेको थियो। विद्यालयले यस्ता कार्यक्रममार्फत विद्यार्थी, अभिभावक र समुदायबीचको सम्बन्ध अझ सुदृढ बनाउँदै आएको छ।
युरो किड्स तथा युरो स्कुल श्रीजनानगर, भक्तपुर प्रि–स्कुलदेखि कक्षा १० सम्म गुणस्तरीय शिक्षा प्रदान गर्दै आएको अग्रणी शैक्षिक संस्था हो।
प्रतिक्रिया