सुरु भयो पश्चिमी वायुको प्रभाव

केही दिनदेखि कुनै उल्लेखनीय मौसम प्रणाली नरहेको नेपालमा आज शनिबार साँझदेखि पश्चिमी वायुको प्रभाव सुरु भएको छ।

जल तथा मौसम विज्ञान विभागको मौसम पूर्वानुमान महाशाखाले शनिबार साँझ ६ बजे जारी गरेको बुलेटिनमा भनिएको छ, ‘हाल देशमा पश्चिमी वायुको आंशिक प्रभाव छ।’

यसअघि आजै बिहान ८ बजे जारी बुलेटिनमा देशभर कुनै उल्लेखनीय मौसम प्रणालीको प्रभाव नरहेको उल्लेख थियो। 

मौसम महाशाखाको प्रक्षेपणअनुसार सोमबारसम्मको मौसम यस्तो रहनेछ:

आज राति : गण्डकी प्रदेश, कर्णाली प्रदेश र सुदूरपश्चिम प्रदेशका पहाडी तथा हिमाली भूभागमा साधारणतया बदली रही बाँकी भूभागमा आंशिक बदली रहने छ। गण्डकी प्रदेशको हिमाली भूभागका एक-दुई स्थानमा हल्का वर्षा/हिमपात हुने सम्भावना छ।

मंसिर २१ गते (आइतबार) 

दिउँसो : देशभर आंशिक बदली रहनेछ।

राति : कोसी प्रदेश, कर्णाली प्रदेश र सुदूरपश्चिम प्रदेशलगायत गण्डकी प्रदेशका पहाडी भूभागमा आंशिक बदली रही बाँकी तराई भूभागमा मौसम मुख्यतया सफा रहने छ। गण्डकी प्रदेशका हिमाली भूभागका एक-दुई स्थानमा हल्का वर्षा/हिमपातको सम्भावना छ। 

मंसिर २२ गते (सोमबार) 

दिउँसो : कर्णाली प्रदेश र सुदूरपश्चिम प्रदेशलगायत कोसी प्रदेश र गण्डकी प्रदेशका पहाडी भूभागमा आंशिक बदली रही बाँकी भूभागमा मौसम मुख्यतया सफा रहने छ। गण्डकी प्रदेश र कर्णाली प्रदेशको हिमाली भूभागका एक-दुई स्थानमा हल्का वर्षा/हिमपातको सम्भावना छ। 

राति : कोसी प्रदेश, गण्डकी प्रदेश र कर्णाली प्रदेशका पहाडी भूभागमा आंशिक बदली रही बाँकी तराई भूभागमा मौसम मुख्यतया सफा रहने छ।