कौशलटारमा मोटरसाइकल दुर्घटना हुँदा ३० वर्षीय युवाको मृत्यु

भक्तपुरको कौशलटारमा मोटरसाइकल दुर्घटना हुँदा एक युवाको मृत्यु भएको छ।

बिहीबार साँझ मध्यपुरथिमी नगरपालिका ३ कौशलटारमा बा ३९ प ५७४१ नम्बरको मोटरसाइकल आफैँ अनियन्त्रित भइ दुर्घटना हुँदा मध्यपुरथिमि नगरपालिका ५ का ३० वर्षीय अजय श्रेष्ठको मृत्यु भएको हो।

घाइते श्रेष्ठको उपचारको क्रममा मृत्यु भएको महानगरीय प्रहरी वृत थिमिका प्रहरी नायब उपरीक्षक शान्तिराज कोइरालाले जानकारी दिए।

दुर्घटनामा गम्भीर घाइते भएका उनलाई उपचारका लागि मध्यपुर अस्पताल पुर्याइएको थियो। उपचार कै क्रममा उनको मृत्यु भएको हो।

पानी परेर चिप्लो भएको सडकमा तीब्र गतिमा गुडाउँदा अनियन्त्रित भएर मोटरसाइकल पल्टिएको प्रहरीले जनाएको छ।