युनिकोड
नेपाल बार एसोसिएसनमा ५५ प्रतिशत मतगणना सकिएको छ।
आइतबार सुरु भएको मतगणना सोमबार दिनभर चलेको थियो। सोमबार राति ८ बजेसम्म करिब ५५ प्रतिशत मतगणना सकिएको निर्वाचन समितिले जानकारी दिएको छ।
चैत २३ गते देशभरका बार सदस्यले नेपाल बारको २५ सदस्यीय कार्यसमितिका लागि प्रत्यक्ष मतदान गरेका थिए। त्यस क्रममा ७ हजार ९९५ मत खसेको छ।
देशैभरिबाट मतपेटिका संकलन गरी काठमाडौँमा गणना भइरहेको छ।
पछिल्लो अद्यावधिक विवरणअनुसार, अध्यक्षमा वरिष्ठ अधिवक्ता विजयप्रसाद मिश्रले २ हजार ८८२ मत प्राप्त गरेका छन्। उनको यो मत निकटतम प्रतिद्वन्द्वी वरिष्ठ अधिवक्ता रमनकुमार श्रेष्ठको तुलनामा दोब्बरभन्दा केही बढी हो।
श्रेष्ठले १ हजार ४२५ मत पाएका छन्।
मिश्र नेपाली कांग्रेस, नेकपा एमाले र राप्रपानिकट कानुन व्यवसायीका संगठनहरुको संयुक्त प्यानलबाट अध्यक्षका उम्मेदवार हुन्। श्रेष्ठ नेकपा माओवादी केन्द्र, नेकपा एकीकृत समाजवादी र रास्वपानिकट कानुन व्यवसायीको प्यानलका हुन्।
अन्य पदमा पनि मिश्र नेतृत्वकै प्यानल अगाडि छ।
महासचिव पदमा अझै फराकिलो मतान्तरले मिश्र टिमका केदारप्रसाद कोइराला अगाडि छन्। कोइरालाले २ हजार ८६० मत पाउँदा उनका प्रतिद्वन्द्वी यज्ञमणि न्यौपानेले १ हजार २३८ मत पाएका छन्।
सबै उम्मेदवारको मत हेर्नुहोस्ः
प्रतिक्रिया