मन्त्री यादवको दाबी : ९८ प्रतिशत नागरिकलाई आधारभूत खानेपानीको पहुँचमा पुर्‍याइसक्यौँ

खानेपानी मन्त्री प्रदीप यादवले ९८ प्रतिशत नागरिकमा आधारभूत खानेपानीको पहुँच पुगेको दाबी गरेका छन्।

बिहीबार राष्ट्रिय भूकम्प सुरक्षा दिवसको अवसरमा लतिपुरमा आयोजित ‘भूकम्प र विपद्  जोखिम व्यवस्थापन’ विषयक कार्यशाला गोष्ठीमा बोल्दै उनले यस्तो दाबी गरेका हुन्। उनले अबको एक वर्षभित्र शतप्रतिशत नागरिकमा आधारभूत खानेपानी पुर्‍याइसक्ने घोषणा समेत गरे।

उनले भने, ‘अहिले हाम्रो मुलुकमा ९८ प्रतिशतन नागरिकलाई आधारभुत खानेपानी सेवा पुर्‍याएका छौं। अहिले पनि दुई प्रतिशत जनतामा आधारभूत खानेपानी पुर्‍याउन सकेका छैनौं। त्यसको लागि हामी निरन्तर लागिपरेका छौं। मलाई विश्वास छ एक वर्षभित्रमा सयप्रतिशत जनतामा आधारभुत खानेपानी पुर्‍याउँछौं। यो मेरो प्रतिवद्धता पनि छ।’

उनले अहिले २७ प्रतिशत नागरिकले मात्र शुद्ध खानेपानी पिउन पाएको उल्लेख गर्दै एक वर्षभित्र ५७ प्रतिशत नागरिकलाई शुद्ध खानेपानीको पहुँचमा पुर्‍याउने गरी काम गरिरहेको बताए।

उनले सरकार जनताका आधारभूत आवश्यकता पूरा गर्न संवेदनशील रहेको बताए।

काठमाडौं उपत्यकामा रहेको खानेपानीको समस्या साधानका लागि निरन्तर काम गरिरहको मन्त्री यादवको भनाई छ।