युनिकोड
प्रधानसेनापति प्रभुराम शर्माले नेपाली सेनाको संगठन प्रमुखका रूपमा आफ्नो तीन वर्षे कार्यकालमा सम्पन्न भए गरेका उपलब्धि सार्वजनिक गरेका छन्।
आगामी भदौ २४ गतेदेखि अवकाशमा जान लागेका प्रधानसेनापति शर्मा शुक्रबारदेखि घर बिदामा बस्दै छन्। त्यसको पूर्वसन्ध्यामा आज नेपाली सेनाका सकल दर्जालाई सम्बोधन गर्दै आफ्नो कार्यकालका उपलब्धिबारे जानकारी गराएका हुन्।
आफ्नो कार्यकालका लागि निर्धारण गरिएका लक्ष्य र प्राप्त उपलब्धिको समीक्षा गर्दै प्रधानसेनापति शर्माले सदैव इमान्दारिता, वफादारिता, निःस्वार्थ भाव र निरन्तर परिश्रमलाई मूलमन्त्रको रूपमा अंगीकार गरी कार्य जिम्मेवारी पूरा गर्न निर्देशन दिए। उनले भने, ‘व्यक्तिगत स्वार्थभन्दा संस्थागत स्वार्थलाई शिरोपर गरी राष्ट्र तथा संगठनको हितअनुरूप कार्य गर्नुहोला। भावी प्रधानसेनापतिलाई पनि मलाईजस्तै साथ र सहयोग मिल्ने विश्वास लिएको छु।’
त्यस अवसरमा नेपाली सेनाले निर्माण जिम्मा लिएका विभिन्न पूर्वाधार आयोजनाको प्रगति अवस्थाबारे प्रधानसेनापति शर्माले जानकारी गराए।
काठमाडौँ–तराई द्रुतमार्गका १२ वटा प्याकेजको ठेक्का कार्य सुरू भएको, नौ वटा सुरुङमार्गमध्ये चार वटाको ‘ब्रेक थ्रु’ भइसकेको, पहिलोपल्ट अग्ला पुलको निर्माण कार्य अगाडि बढेकोलगायत विवरण उनले प्रस्तुत गरे।
राष्ट्रिय प्रतिरक्षा विश्वविद्यालयको प्रक्रियागत कार्य सम्पन्न भई भवन निर्माणको चरणमा गएको उनले जानकारी दिए।
नेपाली सेनाले काम गरिरहेको कर्णाली करिडोरअन्तर्गत लालीबगर–दुल्लीकुन्ना ११ किलोमिटर खण्डको निर्माण कार्य सम्पन्न भई हुम्ला सदरमुकाम सिमकोट राष्ट्रिय सडक सञ्जालमा जोडिएको पनि प्रधानसेनापति शर्माले समीक्षा प्रतिवेदनमा उल्लेख गरेका छन्।
रक्षा मन्त्रालयको सुपरीवेक्षण तथा नेपाली सेनाको नेतृत्वमा दक्षिण एसियामा नै पहिलोपटक ‘पार्टनरसिप फर टेक्नोलोजी इन पिसकिपिङ’ संगोष्ठी कार्यक्रममा सहभागी भएको, बहुराष्ट्रिय शान्तिकार्यसम्बन्धी अभ्यास गरेको तथा संयुक्त राष्ट्र संघीय शान्ति मिसनका लागि अन्तर्राष्ट्रिय दिवसका अवसरमा सहभागी भएको प्रसंग पनि उनले प्रगति विवरणमा उल्लेख गरेका छन्।
शान्ति स्थापना कार्यमा नेपाली सेनाको सहभागिता र क्षमता अभिवृद्धि गर्ने उद्देश्यका साथ बाराको जितपुरमा ‘पिसकिपिङ लजिस्टिक अपरेसन सेन्टर’ को स्थापना गरिएको, छाउनीस्थित वीरेन्द्र अस्पतालमा ‘मास क्याजुअल्टी ट्रिटमेन्ट सेन्टर’ को निर्माण कार्य अगाडि बढेकोलगायत कार्यप्रगतिको जानकारी प्रधानसेनापति शर्माले प्रस्तुत गरे।
काठमाडौँबाहिर स्वास्थ्य सेवा विस्तार गर्ने उद्देश्यले लुम्बिनी प्रदेशलाई लक्षित गरी बुटवलमा सैनिक अस्पताल निर्माण सम्पन्न भई सञ्चालनमा आएको, आत्मनिर्भर बन्दै जाने योजनाअनुरुप नेपाली सेनालाई आवश्यक जुत्ताहरू, पञ्चु तथा पाल–सायर कारखाना निर्माण भई उत्पादन सुरु भएको उनले बताए।
स्नातक तहमा इञ्जिनियरिङ अध्यापनको लागि भक्तपुरको खरिपाटीमा नेपाली सेना इन्जिनियरिङ अध्ययन संस्थानको भवनको शिलान्यास गरिएको, बुटवलमा सैनिक आवासीय महाविद्यालय निर्माण भई शैक्षिक सत्र २०८१ बाट सञ्चालनमा आएको उनको भनाइ छ।
नेपाली सेनाका बहालवाला तथा अवकाशप्राप्त सकलदर्जाका फरक क्षमता भएका सन्ततिलाई उचित स्याहार तथा शिक्षा प्रदान गर्ने उद्देश्यले छाउनीमा ‘वरदान फरक क्षमता विद्यालय’ निर्माण भई २०८१ आसारबाट पठनपाठन सुरू भएको जानकारी पनि उनले दिए।
सैनिक अस्पतालमा उपचार नहुने गम्भीर प्रकृतिका रोगको उपचारका लागि स्वास्थ्य बिमा सुविधा प्रदान गर्ने व्यवस्था गरिएको, अन्य हिताधिकारीसरह अधिकृत क्याडेट र सैन्यलाई पूर्ण स्वास्थ्य बीमा ७ लाख रूपैयाँ प्राप्त गर्ने गरी आबद्ध गरिएको पनि उनले उल्लेख गरे।
सैनिक सेवामा १० वर्ष पूरा गरेका श्रीमान्-श्रीमतीको नाममा घर नरहेका बहालवाला सकलदर्जालाई सहुलियतपूर्ण ब्याजदरमा आफ्नै निजी आवास निर्माणको लागि २५ लाखसम्मको ऋण प्रदान गर्ने गरी ‘सैनिक सकलदर्जा सहुलियतपूर्ण आवास कर्जा २०७८’ कार्यान्वयनमा ल्याई लागू भएको पनि उनले स्मरण गरे।
कल्याणकारी कोषको आय बढाउन ‘फ्युल स्टेसन’ को संख्या बढाई विस्तार गर्ने योजनाअनुरूप २०८० सालमा इटहरीमा र सीतापाइलामा पेट्रोल स्टेसन सञ्चालनमा आएका र वीरेन्द्र शान्ति कार्य तालिम केन्द्रमा सुविधा सम्पन्न आधुनिक भौतिक संरचनाको निर्माण भएको उनले उल्लेख गरे।
आजै प्रधानसेनापतिले नेपाली सेनालाई विविध क्षेत्रबाट सहयोग पुर्याउने गैरसैनिक चार जना र सैनिक ५० जनालाई एक समारोहका बीच ‘प्रधान सेनापति प्रसंशा निशान’ प्रदान गरे।
प्रतिक्रिया